Fashion Fiesta

Mizote hian incheina kan uar viau e ti lo chuan a lo chhuahna ṭobul han chhui emaw, belhchian deuh nachang hria kan tlem khawp mai. Khawthlang ramah te chuan kum zabi sawmpariatna lai daih tawh aṭang khan an thawmhnaw lo chhuahna bulte chhuiin an lo ngaihven daih tawh a, thawmhnaw hi incheina satliahah ngai ngawt lovin a hlutna an lo hre daih tawh a, hnam (Culture) nena inthlunzawm tlat anih vangte pawh a ni a nge, hnam humhalhna ṭha tak pakhatah ngaiin, a dah ṭhatna hial an din ta. Heng hmunte hi mimal tak pawha ka tlawh chak leh ka lo suangtuah
ṭhin a ni a, remchang a awm a, sum lama harsatna te in nei lo anih chuan heng hmun pawimawh te hi tlawh ngei chi niin ka hria.

1) Christian Dior Museum And Garden : France hmun pakhat Granville-a Christian Dior naupan laia a chenna hmun ngei maiah chuan Dior hian an thawmhnaw hlu zual bik leh hralh loha phochhuah chauh chi angte dahin mipui en theih turin an siam a, an collection zinga hlu zualte hemi hmunah hian an phochhuak ṭhin a ni.

2) Ferragamo Museo : Florence, Italy-a Museum pakhat chu designer lar tak pheikhawk Wedge leh Cage heel an tih mai hmuchhuaktu Salvatore Ferragamo hmingchawia siam a ni a, milar tam tak ten a pheikhawk siam lo bun tawh ṭhinin, he Museum tihluzualtu erawh Marilyn Monroe-i'na a pheikhawk a bunsak, exhibition-a an pho≠chhuah chuan he pheikhawk designer larzia leh hlutzia a tilang chiang hle a ni.

3) Museum at FIT : New York khawpuia fashion institute pakhat, Fashion Institute of Techno≠logy an tih mai chuan Museum changtlung tak mipuitena a thlawna an tlawh theih tur an nei a, exhibition leh school-a zirlaite collection mai bakah designer lar Chanel leh Balenciaga te sulhnu hmuh theihin an phochhuak. Tunhnaia an phochhuah hnuhnun, mite ngaihven hlawh em em chu kum tam tak kalta aṭanga lingerie (bra leh kekawrte set) lo inthlak danglam chhoh dan an phochhuah te hi a ni.

4) Foundation Pierre Berge-Yves Saint Laurent: He foundation hi 2002-a Saint Laurent-in a designing hna a chawlhsan dawn tih a puan ṭuma din niin, hun rei tak a lo kawp tawh leh a business partner Pierre Berge-te hmingchawia siam niin film Crazy Love tih hial an siam phahna kha a ni. He Museum-ah hian Couture kawr sang nga zet awmin, a behbawm sing khat leh sang nga chuang leh Saint Laurent-in design a lo siam tawhna drawing sing nga bakah, kum sawmli dawn lai mai fashion huang chhunga a sulhnu dangdai tak tak hmuh theihin an phochhuak a, ama thil chauh ni lovin pawnlam mi, ama thilsiam aṭanga thil siamchhuak ve te pawhin helai hmunah hian mipui hmuh theih turin an phochhuak ve tho a ni.

5) Museum of Find Arts and Lace: Khawvela lace siam≠chhuak hmasa ber pawl leh a siamchhuahna hmunpuia mite hlut em em mai, chu mai bakah he khaw te tak te Alencon, Paris khaw daifema mi, zin mite hip em em mai hmunah hian an lace lo siam≠chhuah tawh te leh siamchhuak hmasa pawl an nih hriatreng nan Museum changtlung tak an din a, vawiin thleng hian helai hmun tlawhtute hmuhlai ngeiin lace an siamchhuak lai en theihin an buatsaih a ni.

6) Gucci Museum : Florence, Italy-ah hmun khuar≠in Gucci chuan helai hmuna 1921-a an fashion label bulṭanna hriatreng nan 2011 khan Gucci Museum chu dinin an Gown hlu tak tak leh man tam, sumina a lei zawh loh khawpa hlute vawn≠-
ṭhatna hmun atan an hmang a ni.

7) Museum of Bags and Purses : Amsterdam-ah chuan Tassen Museum an tih mai bag leh purse vawnṭhatna hmunpui siamin, kum zabi sawmparukna lai daih tawh aṭanga mipa leh hmeichhe bag-te leh vawiin thlenga a lo danglam chhoh dan tihlan niin, milarte hminga bag siamchhuah, Grace Kelly hmingchawi te a awm a, thingpui inna room changtlung tak te nen he khawpui tihlu zualtu a ni.

8) Victoria and Albert Museum : Khawvela art leh design Museum lian ber niin, helai hmunah hian hetiang lam hawi hi chu hmuh loh pakhat mah i nei lovang tih tur khawpin a awm kim a ni. Indian textile aṭanga pheikhawk maksak bun tlak loh tura i rin te thlengin exhibition neih
ṭhin niin, a chhunga fashion kaihhnawih, kum zali liam ta aṭanga mipa leh hmeichhe incheina te leh lukhum dangdai tak tak hmuh tur a awm. He Museum ṭhat lehna em em chu eng emaw changa exhibition tih lovah chuan pawnlam mi tan a thlawna tlawh theihin an siam a ni.

9) Bata Shoe Museum Toronto : Toronto khawpuia Bata Shoe Museum-ah chuan pheikhawk, hmanlai kum zabi sawmpariatna lai daih tawh aṭanga vawiin thlenga pheikhawk lo danglam chhoh dan tihlan a ni. China nu hoin Slipper, thinga siam an bunte leh, Yucca Sandal, Native American hoina an bun te lehh, Union Jack Platform Boots, Spice Girls zinga Ginger Spice-i'n a rawn tihlar takte hmuh theihin an pholang a ni.

10) Fashion Museum : Bath, England-ah chuan fa≠shion chanchin ziak mi Doris Langley Moore chuan a mimal ina mipa leh hmeichhe thawm≠hnaw a khawn khawm hmangin Museum a siam a, kum zabi sawm pasarihna daih tawh a thawmhnaw te leh, vawiin thlenga incheina te chu Mannequins-ah pho≠chhhuakin, 1963-a an din tirh aṭang daih tawh khan kum tinin dress of the year thlan ṭhin a ni a, helai hmunah hian dahṭhat a ni ṭhin. Heng bakah hian John Galliano, Alexander McQueen leh Versace te kutchhuak mai bakah Audrey Hepburn-i'na Breakfast at Tiffanys-a a thawmhnaw hak te helai hmun tilar zualtute an ni.