India-ah khawvel company lian 56 an awm

Mihring kan tam a, ram a zau bawk a, hei vang hian India hi com­pany-te tana hmun pawimawh leh ṭha a ni. Hei vang hi a ni ang, company te an ṭahng chak hle a, tuna khawvela company lian ber ber 2000 zinga 56 te chu India-a hmunpui ber nei, India-a innghat an ni.

Forbes-in a tihchhuah khawvela company lian leh thiltithei thlan chhuah leh an awmna ramah hian US chu a kawl hnem ber a ni a, China chuan a dawt. US-ah hian company lian 579 zet ten hmunpui an nei a, China chu pahnih­nain company lian 232 te hmunpui ber a ni. Japan chu pathumnaah awmin company 218 ten hmunpui an nei.

Company lian thlan chhuahah hian India-a hmunpui nei, Reliance chu India-a lian ber leh thiltithei ber a ni a, khawvel huapah chuan 142-na a ni thung. Nikum khan Reliance hian 135-na a ni a, nikum aiin a tlahniam hret. A market value hi dollar tluklehdingawn 42.9 a ni a, sales value chu dollar tld 71.7 zet a ni. State Bank of India chu 152-naah a lang pha a, a market value hi dollar tld 33 lai a tling.

India-a hmunpui nei company lian zinga India ta liau liau zingah Oil and Natural Gas chu 183-na a ni a, Tata Motors chu 263-na, ICICI Bank chu 283-na, Indian Oil chu 349-na, HDFC Bank chu 376-na teah an lang pha. Heng bakah hian Tata Consultancy Services (485), Bharti Airtel (506), Axis Bank (558), Infosys (672), Bharat Petroleum (757), Wipro (811), Tata Steel (903) leh Adani Enterprises (944) te chu a langsar zual an ni.

Forbes-in company 2000 a thlan chhuahte hi ram hrang hrang 61-a mite an ni. Heng company sum lakluh belh khawm hi kum khat chhungin dollar tluklehdingawn 39,000 zet a tling (Trillion 39) a, an hlep hi USD tld 3,000 zet a ni a, an hlutna belhkhawm hi dollar tld 162,000 niin, an market value hi dollar tld 48,000 a ni.