Bawngkawn Bial Zaipawl Harhna mil video thar an siam

Mizorama zaipawl tam tak zai dan thlak danglamtir thei khawpa thiam leh huhang ngah ṭhin, Bawngkawn Pastor Bial Zaipawl chuan harhna mil, harhna châwm thei tur music video thar pahnih an rawn tichhuak leh dawn ta a, an peihfel tawh a, tihchhuah hun a ni tawh mai.
Music video album pawh panga lai lo tichhuak tawh Bawngkawn Pastor Bial Zaipawl hian kumin hian music video panga lai mai tihchhuah tumin hma an la mek a, chung zinga pahnih chu an peihfel a, kan hma lawkah hian an tichhuak ang a, cable TV leh YouTube lamah an dah ang.
An hla pakhat zawk hi Mizo Kristian hla ṭha pangngai, harhna a thlen tawha sak bân theih loh zinga mi 'Lalpa chu fakin ka chawimawi ang' tih hla kha a ni a, Kristian Hla Bu 64-na kha Mizo lengkhawm thlukin an sa. A video pawh an uluk a, rawngbawla an zin chhuahna biak in hrang hranga live-a an shot vek a ni a, a hmuhnawm viau ang.
An conductor, PC Lalneih­tluanga phuah, 'Ka dam chhan' tih chu an hla tihchhuah tur dang niin, PC Lalneihtluanga hian 'Malsawmna danglam' tih hle leh 'Lawmna tlâng' tihte kha a phuah a ni. 'Ka dam chhan' tih hla hi kumin March thlaa Pathianin a pek kha a ni a, a music hi Larry a ni. He video tidangdaitu tur chu zaipawl music video a ni chunga model an hmang hi a ni a, hei hian a video a tihmuhnawm zual dawn hle.
Bawngkawn Pastor Bial Zai­pawl conductor chuan nun bei­dawng leh lungngaia awm mekten Pathianah beiseina thar an lo neih theih nan leh khupzawi leh ban uai­thla tawhte tana chakna thar an lo neih theih nan te, ngaithlatu leh thlirtuten taksa leh thlarauah damna an lo chan theih nan ten heng an video-te hi an hlan tih a sawi.