Box Office Kar thum chhung Tenet-in ro a rel ta

US Box Office-ah Tenet bawk hralh a kal leh ber a, The New Mutants bawk pahnihna ni lehin film thar Infidel chu pathumna a ni.

Action-thriller leh spy-fi film Tenet chu US theatre hrang hrangah hralh a la kal ber zel a, sum lalut tam ber a ni leh. Kar thum chhung US Box Office-ah No.1 a ni tawh a ni.

Kar tawp liam taah khan theatre 2,930 aṭangin $4,700,000 a lalut leh a, US-ah ringawt hian $36,100,000 lalut tawhin khawvel puma a sum lakluh chu $maktaduai 249.9 a tling tawh. Hripui leng karah pawh hetiang zat sum hi a lalut thei a, hri leng lo phei se chuan a sum lakluh hi a tam hle ang tih a rin theih.

Robert Pattinson leh Elizabeth Debicki-te channa Tenet hi kumin chhunga film sum lalut tam palina a ni der tawh a, crtitics lamin an fak hle a, theatre tam ber inkhar laia hetiang bud­get lian film an tlangzarh ngam pawh hi film siamtute an huaisen hle a ni.

Massie Williams channa X-Men spin off The New Mutants chu sum lalut tam ber dawttu a ni leh a, Tenet nen erawh hi chuan an sum lakluh a inthlau tawh hle. Kar tawpah khan theatre 2,518 aṭangin $1,823,448 a lalut leh a, khawvel puma a sum lakluh tawh chu $35,041,422 a ni.

American political action thriller film Infidel chu sum lalut tam pa­thum­na a ni a, Jim Caviezel leh Claudia Karvan-te channa Infidel hi kar tawpah khan theatre 1,724-ah pek chhuah a ni a, $1,384,296 a lalut a ni.

He film-ah hian American journalist leh blogger pakhat Dough Rawlins chu  Iranian regime-te'n Cairo-a a awm laiin an rubo a, a nupuiin US sorkar hmanga chhanchhuah a tum a, mahse US sorkar a inrawlh duh tak loah chuan amahin Middle East lamah kalin a pasal a va chhanchhuahna vel a ni a, film critics lam pawhin an fak angreng hle.

Top 5-ah hian Unhinged leh The Broken Hearts Gallery chu lang bawkin palina leh pangana an ni a, heng film pahnih hi theatre sang hnih chuangah an chhuah ve ve a ni.

Horror film thar Alone chu pariat­na a ni a, he film hi tualthattu nunrawng takin nu pakhat a kidnap lam hawi a ni thung. Box Office Mojo chuan chart-ah film 28 a tarlang a, film thar awm nualin The Secrets We Keep, No Escape, The Nest, The Way I See It leh Foster Boy-te chu chart-ah hian an lang bawk a ni. 

1    Tenet    $4,700,000

2    The New Mutants    $1,823,448

3    Infidel    $1,384,296

4    Unhinged    $1,281,563 

5    The Broken Hearts Gallery    $802,322

6    The SpongeBob Movie: Sponge on the Run

7    Bill & Ted Face the Music

8    Alone    $182,473

9    The Personal History of David Copperfield    $172,601

10    Words on Bathroom Walls    $147,175