West London-ah ABBA-in reunion an nei

Swedish pop band ABBA chuan tunhnaiah reunion an nei niin khawthlang lam media-te chuan an tarlang a, West London-ah an hologram tour neih tur filming an nei niin an sawi.

Agnetha Fältskog, Björn Ulvaeus, Benny Andersson, leh Anni-Frid Lyngstad-te chu an avatar show neih turah West London-a Ealing Studios-ah an inzawmkhawm leh tawh niin thuthang a awm a, hei hi nakkum lama an indin kum 50-na champha puala tour an neih tur atana an inbuatsaihna niin an tarlang bawk.

The Sun chanchinbu Bizarre column-ah pawh hemi chungchang hi tarlan a ni a, tlem tlema recording an tih ṭhin thute thlengin an tarlang. Swedish legend-te hian hla panga an record thar tih thlengin an tarlang tawh a, Bjorn chuan hemi chungchang hi journalist pakhat hnenah tunhnai khan a lo sawi chhuak ni awm tak a ni. 1970's vel aṭanga ABBA zai lo bukpui ve nghawng nghawng tawh ṭhin tan chuan ABBA thu thar hi thil hriat nuam tak a nih a rinawm.

ABBA hi kum 1972 khan Sweden khawpui Stockhlom-ah an indin a, 70's leh 80's chhoah kha chuan anni aia pop group lar hi sawi tur an tam lo hle ang. An hla leh album hrang hrang hmangin khawvel ram hrang hrang chart-ah roreltu an ni a, Eurovision Song Contest 1974-a pakhatna an nihna hmanga khawvel deng chhuakin kum 1982 khan an perform ho a ni.

Mumal takin an kehdarh tih thuchhuah siam lo mah se kum 1982 hnu lamah kha chuan an reh zui ta vang vang a, mahse kum 2016 khan an zai ho leh a, kum 2018 vel aṭang khan an inzawm khawm ṭha leh tih thawm hi hriat tur a awm ta deuh reng bawk a, nakkum lamah hi chuan an thawm kan hre chhunzawm leh tak tak dawn ta niin a lang.