Tom Hardy 'James Bond' kan hmu dawn em ni?

James Bond film thar ber tura changtu tur atan Tom Hardy hming chu sawi lan a ni a, a chang dawn a nih chuan Daniel Craig a thlak ang.

A hma aṭang tawhin Tom hardy hming hi James Bond film chang tura sawi a lo ni fo tawh a, he film chang tur atan hian kumin June thla khan kum 43 mi Tom Hardy hian audition a neih tawh thu The Vulcan Reporter chuan a tarlang.

'Venom' actor Tom Hardy leh James Bond hming sawi zawm a nihna hi a rei tawh hle mah se thuchiang erawh a la awm thei lo a, The Vulcan Reporter tarlan pawh hi pawm bur chi a la ni lo mai thei. Tuna James Bond role play mektu Daniel Craig erawh No time To Die-ah bak hian a inlan tawh dawn lo tih a chiang tawh thung.

007 hi British agent a nih angin he role lo chang tawhtu tam ber chu British mi emaw, Great Britain lam thisen kai an ni tlangpui a, Tom Hardy pawh hi English actor a nih angin a chan ngei ringtu an tam hle a, he role hi a hnehsawh ring pawh an tam hle nghe nghe.

Lemchan lamah sulhnu a hnutchhiah ṭha tawh hle a, chung zingah chuan Star Trek: Nemesis,  The Revenant, Lawless, Mad Max: Fury Road leh Christopher Nolan-a film Inception leh Dark Knight Rises bakah Dunkirk-te pawh a tel a ni. 

November 12 hian 'James Bond 007 : No time To Die' film chu tlangzarh tum a ni a, nikum December 4 khan YouTube lamah he film trailer hi tihchhuah a lo ni tawh a ni. Kumin April thla khan tlangzarh tura an ruahman kha a ni a, mahse Covid-19 hri leng vangin ṭhulh leh a ni. November-a tlangzarh tur hi hri leng vanga ṭhulh leh a nih chuan nakkum lamah tlangzarh a nih tawh an ring.