Twitter-ah an hming an thlak

Australian pop rock band, khawvel nula tam takin an atchilh, 5 Seconds of Summer chuan Twitter-a an hming an thlak a, ngaihven a hlawh hle.

Nilaini khan 5SOS hian an official Twitter chu a hming an thlak a, a hming thar hi Doge SOS a ni. Thlalak an dah pawh sakeibaknei anga chei ui, Doge a ni. A hma pawhin 5SOS hian an Twitter hming hi an lo thlak zeuh zeuh tawh ṭhin a, nikum khan 5 Seconds of Ham tiin an lo thlak tawh bawk a, a hmain Ham aiah hian Ewok leh Toast te pawh an lo hmang tawh bawk.

5 Seconds of Summer hi kum 2011-a an din kha a ni a, an music hi pop punk/ pop rock/ power pop titein an sawi ṭhin. Band member-te hi - Luke Hemmings (lead vocals, guitar), Michael Clifford (guitar, vocals), Calum Hood (bass guitar, vocals), leh Ashton Irwin (drums, vocals) te an ni.

Luke Hemmings hi kum 1996 July 16-a piang a ni a, Michael Clifford hi November 20, 1995-ah, Calum Hood hi January 25, 1996-ah leh Ashton Irwin hi July 7, 1994-a piangte an ni hlawm. An extended play, Unplugged aṭang khan hriat an hlawh a, he album hi Australia-a iTunes chart-ah chuan pathumna lai a thleng pha.

Band anga an din hma hian YouTube-ah mi hla an sak an dah chhuak a, hei hian ngaihven a hlawh a, Sony chuan a ngaihven zui a, an thawkho zui ta a ni. An concert hmasa berah chuan entu mi 20 chauh an awm!

Katy Perry fan-te Katy Cat an tih ang chia an fan-te kohna bik anmahni hi chuan an nei hran lo a, mahse an fan-te chuan 5SOSFam emaw, 5soser tiin emaw an insawi ṭhin a, 5soser hi 5 sauce tiin an lam. X Factor-a tel ve an tum a, mahse a hnua X Factor band tia an sawi zui tur an ngaihtuahin an duh leh lo a ni.