Lady Gaga-i'n album thar tur hming a puang

Lady Gaga chuan March 7, 2025-ah album thar a ti chhuak dawn a, a album thar tur pawh puang tawhin, 'Mayhem' tih a ni dawn tih a sawi. Hei hi a studio album pasarihna tur niin hla 14 a awm dawn a ni.

'Mayhem' hma hian Billboard 200-a No 1 ni thei album eng emaw zat a lo nei tawh a, heng zingah hian 'A Star is Born' soundtrack bakah 'Joanne' leh 'Born This Way' pawh an tel. Bruno Mars nena an duet-na, 'Die With a Smile' chuan Spotify-ah stream 1 billion a nei tling tawh bawk. He hla hi a album tharah hian a dah tel dawn a ni. Lady Gaga hi Los Angeles ram kang tuartute tana vehbur khawnna tur, FireAid benefit concert-ah a zai dawn bawk. He concert-ah hian Billie Eilish, Olivia Rodrigo, Stevie Nick, Joni Mitchell bakah artist lar tak tak an in lan ang.