2024-ah Spotify-in music industry hnenah USD tld 10 pe chhuak

Music streaming service lian, Spotify chuan kum 2024 khan music industry-ah USD tld 10 a pe chhuak tih sawiin, a la pek chhuah tam ber ṭum a ni. Kum 10 liam taa an service siam a nih aṭangin music industry tan a a sum pek chhuah hi USD tld 60 a tling tawh.

Spotify-in music industry tana sum a pek chhuah hi artist-te chauh ni lo, an thawhpui hrang hrang, publisher thlengin an tel a ni. Spotify kaltlang hian kum 2014 khan kum khata USD 10,000 la lut thei artist hi 10,000 vel an nih laiin, kuminah chuan USD 100,000 la lut thei artist 10,000 chuang an awm tawh a ni. Heng bakah USD mtd 1 chuang la lut artist 1,250 awmin, USD mtd 10 chuang la lut hi 60 an awm bawk. Spotify hi music streaming service dang aiin a rate a hniam thung a, stream 1,000-ah USD 3.0 zel a pe a ni.

Music streaming service hrang hranga paid subscriber hi mtd 500 vel an awm mek a, Spotify bik hian subscriber mtd 252 neiin, paid subscriber tluklehdingawn khat neih theih an tum a ni. Spotify VP David Kaefer chuan mi tu tan pawh an hla record chu Spotify-ah dah theih a ni tiin, tupawh an lo lawm thu a sawi.