Awmawmi'n solo video a tichhuak Fakna hla aia a thlan ram ngaih hla!

Mizo Idol 2013-a top 5, Awmawmi chuan Tluanga nena duet music video an tihchhuah hnu­ah solo-in music video a tichhuak leh ta. Zanin dar 6:50 hian Zonet-ah pek chhuah a ni ang.

Awmawmi hla hi 'Lo vul leh rawh' tih a ni a, ram ngaih hla a ni. AIdol-a intihsiak lai aṭang tawh khan fakna hla a sa ngar ngar ṭhin a, tunah ram ngaih hla a tichhuak leh daih thung. Awmawmi chuan, "Tuna mi hi fakna hla aia sak ka thlan zawk a ni," a ti. Mahse hetia ram ngaih hla a sak tak zawk avang hian a hnu zelah ram ngaih hla a sa zel ang tihna a ni lo. "Tun bak hi a dang ka sa leh ang em tih ka soi mai thei lo a, mahse ka sak tawh loh ka ring deuh. Fakna hla sak hi ka duh ber a ni," a ti.

"Tuna ka hla sak phuahtu hi HC Lalrinawma a ni a, fakna hla leh ram ngaih hla hi a nei a, fakna hla zawk sa turin min duh deuh zawk. Mahse, ka ngaithla chhin a, ram ngaih hla hi ka ngaihthlak tirh aṭangin a nalhin a mawi ka ti zawk a, ka thlang ta zawk a ni. A thu a ṭha a, ka duh hle a ni," a ti.

'Lo vul leh rawh' tih hlaah hian Awmawmi te chhungkua an phur a, nasa takin an pui a, background vocal-ah pawh midang hmang loin Awmawmi hian a nu a hmang. Awmawmi pa hi chu kan hre viau, K. Lalchamliana a ni a, tunge a nu tih hre lo tam tak kan awm ang. A nu hi zaithiam tho a ni a, H. Zosangliani kha a ni a, mi tam berin kan hriat dan tur chuan Vanlalsailova nena "Tawnmang si lo hmangaihna vanduai" tih hla an sak aṭang khan a ni mai thei. Hei bakah 'Chûn hrawn vang' leh 'Nunhlui ngaihawm' tihte pawh kha a sak a ni.

"Video kan buaipui chho ṭan zel a, kumin chhung pawh hian ka dam phawt chuan eng emaw zat tihchhuah ka duh a ni," tiin Awmawmi hian sawiin, "Apa hi a duh uluk lutuk a; music mai bakah ka zai dan tur thlengin a duh ang taka siam a duh ṭhin," tiin a chhungten an tuipuia a, theihtawp an chhuahpuizia sawi lan pahin a pain a puih dan a sawi chhuak.