2020 Academy of Country Music Awards Entertainer Of The Year dawngtu pahnih an awm

Academy of Country Music Awards (ACM) vawi 55-na chu Ningani zan khan sem a ni ta a,  Entertainer of the Year chu mi pahnih - Thomas Rhett leh Carrie Underwood-te'n an dawng.

Covid-19 hripui a len avangin sem hun hi thla nga laiin an tlai a, host chu Kaith Urban a ni.

Kumin ACM semna ceremony hi hmun thum aṭanga pek chhuah a ni a, Grand Ole Opry House, Ryman Auditorium, leh Bluebird Café, Nashville aṭangtein CBS chuan a broadcast. 

Kumin ACM-ah hian ACM history-a thil la thleng ngai lo a thleng a, award ngaih hlut hlawh tak Entertainer of the Year chu mi pahnihin dawngin Thomas Rhett leh Carrie Underwood-te'n he award hi an dawng. Carrie Underwood hian kum 2009 leh 2010 kha he award hi a lo dawng tawh nghe nghe.

Luke Combs, Marem Morris, Thomas Rhett leh Tenille Townes-te chuan award pahnih ṭheuh an dawng a, Thomas Rhett hi nomination hmu tam ber niin pali a hmu a ni.

Female Artist of the Year chu Maren Morris-in a dawng a, Male Artist of the Year chu Luke Combs-in a dawng thung. 

Group of the Year chu Lady A kutah hlan niin Dan+Shay chu Dou of The Year-ah thlan an ni ve bawk a, Blake Shelton 'God's Country' chu Single of the Year a nih laiin Song of the Year chu  'One Man Band' - Josh Osborne,

Matthew Ramsey, Trevor Rosen, Brad Tursi a ni ve bawk.

Video of the Year chu Thomas Rhett-a'n "Remember You Young' hmangin a dawng.

Country music sawi chuan mi tam tak rilruah Nashville hi a awm ngei ang, chuti chung chuan kumin hi Nashville-a ACM an sem ṭum khatna a ni. Nashville sound tia an hriat lar, country music hnuaia subgenre pakhat hi Nashville aṭanga an chin chhuah a ni a, 1940's leh 50's chhoa honky tonk music aṭanga tunlaia country music kan hriat lar ang rawn irhchhuahna hmun hi a ni bawk a, Nashville-a award semna neih a ni hi artist tam tak pawhin an ngaih hlut thu an sawi uar hle.