Swift leh Harris Khawvela tuak hausa ber
Forbes chanchinbu chuan celebrity zinga tuak (nupa kher lo, inngaizawng pawh tiamin) hausa ber a thlang chhuak a, Jay Z leh Beyonce ni tawh loin, Taylor Swift leh Calvin Harris te an hausa ta ber.
Taylor Swift leh Calvin Harris te sum neih zat hi dollar mtd 146 zet a ni a, Jay Z leh Beyonce te aiin an hausa tawh zawk a ni. An sum neih zat tarlan hi thla 12 kal ta chhunga mi kha a ni. Taylor Swift hi zaithiam a ni a, Calvin Harris hi Scottish DJ hlawhtling a ni. An inngaihzawnna la rei lo mah se, tunah chuan lang chhuakin khawvel hriat khawp an ni tawh a ni.
Swift hi music lama a hlawhtlinna bakah Diet Coke, Keds leh Sony te nen sumdawnna kawngah hma an laho a, heta ṭang hian hlawkna tam tak a nei. Harris thung hi Giorgi Armani leh headphone siamtu Sol Republic te nen an thawkho bawk.
Jay Z leh Beyonce te nupa chu pahnihnaah an awm a, nikum khan pakhatna an ni. Tun thla 12 chhunga an hausakna chu dollar mtd 110.5 zet a ni. An sum hmuhna lian zingah chuan On The Run tour an neih kha a ni. He tour hi concert tour awm tawhah chuan sum lalut hnem palina a tling. Jay Z hian Roc Nation aṭangin sum tam tak a lalut reng a, hei bakah hian Armand de Brignac champagne leh D’Ussé cognac te hi a sum hmuhna hnar lian a ni. Beyonce hian amahin fragrance line a neih bakah Pepsi, H&M leh company hrang hrangte nen sumdawnna kawngah an thawkho a, a hlawhtling hle.
Miranda Lambert leh Blake Shelton te nupa chu pathumna niin, an hausakna hi dollar mtd 57 a ni. Country singer hlawhtling ve ve an ni a, Blake Shelton hi The Voice-ah a judge a, hei bakah an concert tour aṭangin an hlawhtling hle. The Voice-a a judge avang hian Blake Shelton hian kum khatah dollar mtd 20 a hlawh a, Miranda Lambert hi zai lamah a hlawhtling a, Academy of Country Music Awards-ah khan Female Vocalist, Song of the Year leh Album of the Year te a dawng a nih kha. Heng bakah hian sumdawnna kawng hrang hrang aṭangin sum an lalut hnem hle.