Kristian film siam a hautak "Theihtawpa ṭawngṭai a, zirchian a ngai" : Burnett leh Downey

'The Bible' tih, miniseries hlawhtling taka an tihchhuah hnuah, box office-a pakhatna hauh thei 'Son of God' tih film an siam leh a; kumin khan, Easter behchhanin 'AD: The Bible Continues' an siam leh bawk. Heng film siamtu, Mark Burnett leh Roma Downey te nupa chuan Kristian film siam hi thil namên a ni lo tih an sawi.

"Kristian film siam hi a namai lo a, nasa taka ṭawngṭai mai bakah theihtawp tak meuh meuha a bulṭhut hre tura zirchian a ngai a ni," an ti. Tunah hian an nupa hian "Ben Hur" film an siam leh mai bakah, TLC-a chhuak tur, serial film, 'Answered Prayer' an buaipui mek bawk.

Burnett chuan The Bible leh AD: The Bible Continues an siam chungchang sawiin, "A thawnthu ruangam a dik a ngai si a, engkim mai hian a thu lo awm tawh sa a kalh a rem si lo. Screen-a tihchhuah tura Isua chanchin i buaipui a nih leh lek phei chuan, pawn lam nuna mahni hmasawnna mai chu ngaihtuahna hman pawh a awm lo a ni. Chung ai chuan, engtin nge kan nun a khawih ang a, rinna lamah kan ṭhan len zawk ang a, hma kan sawn zawk ang, tih kan ngaihtuah a ngai zawk a ni," a ti.

Ben Hur an siam mek chu Burnett hian, "In chhawng sang lutuk sak ang mai a ni," tia sawiin, movie an buaipui tawh zinga anmahni cho let nasa berte zinga mi niin a sawi.