Jurassic World-in record a siam

Jurassic World hlawh­tlinzia kan hria a, record a siam hrang hrang hi mumalin tarlang ila he movie hlawhtlinzia hi kan hre thei ang. Tunah hian record chi li a siam mek.

Thawhṭanni thleng khan Jurassic World hian dollar tlukleh­dingawn khat a hmu tling ta a, movie tihchhuah tawh zinga dollar tlukleh­ding­awn khat hmu tling chak ber a ni a, ni 13 chhung lekin a hmu tling thei. A hmaa dollar tlukleh­ding­awn khat hmu tling chak ber chu Furious 7 kha a ni a, ni 17 chhungin a hmu tling a, Juras­sic World hian a rawn khûm chiang hle.

Kar hnih chhuah a nihna, kar tawp liam ta ni thum chhung khan dollar mtd 106.6 a la hmu chhuak thei. Movie tihchhuah tawhah, North America-ah hapta hnihnaa sum lalut hnem ber a ni.

He movie hi chhuah a nih ṭan hapta khan dollar mtd 208 a hmu chhuak a, kar tawp liam taah khan dollar mtd 106 a hmu tling leh bawk. Hapta hnih chhungin dollar mtd 400 a lalut a, movie tihchhuah tawh zinga dollar mtd 400 lalut tling hma ber a ni.

Inrinni liam taa a lak luhte nena chhutin dollar mtd 500, Inrinni thleng khan a lalut a, movie chhuak tawh zawng zawnga dollar mtd 500 hmu chhuak chak ber a ni. A tlangpuiin sawi ta ila, a thlen chinah record a siam chho mawlh mawlh a ni ber mai.