Jurassic World-in hma a la hruai zel

Hapta thum chhuah a nih tawh hnuah pawh Jurassic World chu North America-a sum lalut hnem ber a la ni fan. Kar tawpah khan Seth McFarlane-a channa, Ted 2 tihchhuah a ni chungin, he movie hian a lehthal zo lo mai ni loin, Ted 2 hian beisei a pha lo.

Jurassic World hian kar tawp chhung khan dollar mtd 54.2 a lakluh belh leh a, a che ropui hle reng mai. Hengte nen hian North America-ah dollar mtd 500 a hlawh chhuak tawh a, North America bik chauha movie, dollar mtd 500 hlawh chhuak thei pangana a ni. The Dark Knight khan dollar mtd 534.8 a lalut a, The Avengers in dollar mtd 623.4, Titanic-in dollar mtd 658.7 leh Avatar-in dollar mtd 760.5 te an lalut.

Pahnihnaah Pixar tihchhuah, animated movie, Inside Out kha a la awm a, he movie hi North America bikah hian theatre 4,132-ah chhuah a ni a, heng aṭang hian kar tawpah khan dollar mtd 52.1 a lalut a ni. Khawvel puma a lakluh chu dollar mtd 184.9 lai a ni tawh.

Ted 2 hian beisei a pha lo a, Ted chhuak hmasa zawk, kum 2012-a mi pawh kha a tluk zo lo. Ted 2 hian pahnihna pawh luah pha loin, pathumnaah a awm a, kar tawp chhung khan dollar mtd 32.9 a lalut. North America-ah theatre 3,442 laiah chhuah ni mah se, Ted kha a tluk lo. Ted kha kum 2012-a tihchhuah a nih khan, kar khat chhungin dollar mtd 54.4 zet a thawk chhuak thei a ni.