Rainbow Ṭhazual Lengzem Feli Fanai Hlawhtlinna tlang sangah

Rainbow Ṭhazual Lengzem tihchhuah tharah, Feli Fanai chuan hmun sang ber a luah a, hlawhtlinna tlangah a rawn chuangkai. Top 10-ah ṭha leh zaithiam tak tak hlir an lang a, Feli Fanai tluk erawh an awm lo.

Feli Fanai hian 'Ka liam e' tih hla hmangin pakhatna a rawn hauh a, kumina Ṭhazual chart-a pakhatna ṭum khat a hauhna a ni. Feli Fanai hian 'Ṭhen che ka hlau' tiin a rawn vehthlem hmasa phawt a, chumi hnuah, Kyusho Waza nen 'Khuanu Samsuih' an ti a, mahse khuanu samsuih tak tak a ni lo nge, tunah chuan 'Ka liam e' a rawn ti leh thung si!
'Ka liam e' music video hi May thlaa a dah chauh kha a ni a, ama pual liau liau, miin sa tura an tihte tiam loin, 'Ka liam e' tih hi kum hnih chhunga Feli Fanai music video awm chhun a ni. A awm chhun hi a uluk a, a hla a ṭha bawk a, pakhatnaah a rawn invawrh thei. He hla hi Myztic Sailo phuah a ni a, a phuahtu hi kan hre lar a, tunlai hla, nalh leh ṭhalaite beng fah zawng tak maiin a siam thiam riau.
MDM library-ah a dah deuh chauh tihin, May 18 khan Ṭhazual chart-ah hian 10-naah a rawn lang nghal a, June 1-a chart tihchhuah lehah chuan pasarihnaah a rawn kai thei ta a ni. June 15 khan pathumnaah ngawt a rawn invawrh a, tunah chuan tuma dan rual lohin pakhatna a rawn luah ta.
C. Sanga chu pakhatna aṭangin pahnihnaah a chhuk thla ta thung. C. Sanga hian 'Chhingkhual Lenmawi' tih hla hmangin Rainbow Ṭhazual chart-ah hian pakhatna ṭum hnih lai a hauh thei a, hei hian tunlaia lengzem huang chhunga mipa zaithiam kan neih zinga a ṭha berte zinga mi a nihzia a tilang.
Famkimi Kawlni chu pahnihna aṭangin pathumnaah a chhuk thla a, MSU Shillong-in hma an rawn sawn chak hle. Shillong-a Mizo zirlaite music video siam hi a hmuhnawm a, an zaithiam hlawm bawk. Hetah hian Kum 2013-a Mizo Idol thlana mipui lawm hlawh leh ṭan, Maruati, Champhai Vengthlang nula pawh a tel nghe nghe. Thiamchantira chu a hla 'Lokir rawh' tih hla hmangin panganaah a la awm.