John Mayer leh Mateus Asato-te Signature guitar thar pho chhuak

Khawvela musical gear show lian ber nia an sawi ṭhin, National Association of Music Merchants (NAMM) chu January 16 aṭanga 19 inkharah khan Anaheim Convention Center, Anaheim, California-ah neih a ni. Music instrument siamtu company hrang hrangte chuan an instrument siam chhuah tharte an pho chhuak leh a, rimawi khawvelah thil thar hmuh tur a awm nual. 

NAMM 2020-ah hian guitar leh a kaihhnawihin lawm a hlawh zual a tih theih awm e, JHS pedals, Walrus audio effects, Kemper amps, Chase Bliss Audio leh Neurald DSP-te'n guitar pedal leh amps an siamchhuah thar an phochhuahte chuan lawm a hlawh zual. Guitar company hrang hrangin an guitar model siamchhuah thar phochhuahna hun atan an hmang bawk a, hengte pawh hi he show chhimtute hian an hlut hle.

Suhr chuan Mateus Asato Signature guitar thar Classic T an pho chhuak. Mateus pawh hi a hmunah hian kalin a signature guitar thar hian a lung a dum hle tih instagram lama a post siam aṭangin a hmuh theih.

Mateus Asato Classic T hi telecaster design a ni a, a dum niin a mawi hle. Suhr hian Mateus signature guitar hi pathum an siamna  a ni ta a, pho chhuah a nih hma khan Asato hian a piancham niah a guitar thar hi tlangzarh a ni dawn tih sawiin, piancham thilpek hlu tak a  nih thu a sawi. NAMM-ah pawh hian Classic T hian en a hlawh hle. 

PRS pawhin NAMM 2020-ah hian John Mayer  Silver Sky model thar an pho chhuak ve bawk. Silver Sky thar hi rawng chi hrang hrang an siam a ni. Nebula finish bikah erawh limited edition niin 500 chiah an siam. Silver Sky model tharah hi chuan model hmasaa an siam lem loh, maple fretboard an siam tel a, rosewood pawh an siam tho bawk.

Mayer leh Asato bakah hian guitarist lar tak tak eng emaw zat signature guitar thar pholan a ni bawk. NAMM show hi kum tinin January thlaah neih ṭhin a ni a, music company hrang hrangin an bungraw siam thar pho lanna hmasa atan an lo hmang fo tawh ṭhin a ni.