Floyd Mayweather Sum a la lut hnem ber.

Indian zingah Amitabh, Salman Khan, Akshay, Dhoni te pawh top 100-ah an lang

Pacquiao nena an inhnek kha a hlawkpui ta hle a ni. Forbes-in celebrity zinga tun thla 12 chhunga sum lalut hnem ber a tarlanah boxer Floyd Mayweather chu sum lalut hnem ber a ni.
Manny Pacquiao nena an inhnek aṭang khan Mayweather hian sum a lakluh hnem phah hle. Tun thla 12 chhungin Mayweather hian dollar mtd 300 vel zet a hlawh a, Pacquiao hian dollar mtd 160 a hlawh chhuak thung a, Pacman hi sum lalut hnem pahnihnaah a awm. Mayweather hi a kum zawnin pakhatnaah a awm ta.
Pathumnaah hian Katy Perry a awm daih thung. Katy hian Pacman leh Mayweather te inhnek kha chuti hehuah a ngai lo nachungin, music khawvelah chuan sum erawh a lalut hnem hle. Thla 12 chhungin dollar mtd 135 zet a hlawh chhuak thei. Katy hian Prismatic World Tour kha a hlawhtlinpui hle a, kha tour-ah khan, khawvel ram 27-ah concert vawi 124 zet a nei. Heng zinga concert 75 te chu US pawn lamah a ni. A manager-in a sawi danin, Katy Perry sum lakluh zaa 60 zet hi chu US pawn aṭanga a lakluh a ni.
Concert-na aṭanga hlawhtling leh sum lalut hnem bawk, One Direction chu palinaah an awm. One Direction-in tun thla 12 chhunga concert an neih zawng zawng hi ni 74 zet a tling. Panganaah American TV show personality, Howard Stern a awm. Top 10-a lang pha lo zingah, Beyonce Knowles chu 29-naah a awm a, Vin Diesel chu 43-na niin, Kim Kardashian chu 80-naah a lang.
India mi zingah Amitabh Bachchan leh Salman Khan te chu 71-naah ve ve an lang a, dollar mtd 33.5 ve ve an hlawh. Akshay Kumar chu thla 12 chhung khan dollar mtd 32.5 hlawh chhuak hmanin, 76-naah a lang a, MS Dhoni chuan dollar mtd 31 lalutin, 82-naah a lang bawk.