Academy member-ah Dev Patel

Oscar awards sem ṭhintu, Academy of Motion Picture Arts and Sciences chuan an member turin sawmna an sem ṭhin a, chung aṭang chuan member an inla ṭhin. Kuminah hian member sawmna ṭhahnem tak sem chhuakin, chung zingah chuan Indian chhul chhuak, Slumdog Millionaire film-a mi, Dev Patel pawh a tel a, an sawmho hian an lo pawm a ni.

Academy of Motion Picture Arts and Sciences hian nikum khan mi 271 te hnenah an member ni tura sawmna an thawn chhuak a, heng mi 271 te hi an member-ah an lalut vek a ni.

Dev Patel bakah hian Oscar sem taka Best Actor dawng, Eddie Redmayne chu a tel a, ani bakah hian Emma Stone, zaithiam John Legend, Nine Inch Nail-a an vocalist, Trent Reznor te, Elizabeth Banks, Benedict Cumberbatch, Martin Freeman, Tom Hardy, Kevin Hart, Felicity Jones, David Oyelowo, Rosamund Pike, Chris Pine, Daniel Radcliffe, Jason Segel, J.K. Simmons te pawh an tel a ni. Kumin hian mi 300 chuang hnenah an member ni tura sawmna hi an sem chhuak.