AVA MAX album hmasa ber 'Heaven & Hell' a ngaihthlak theih ta
American singer 'Ava Max' chuan a album hmasa ber 'Heaven & Hell' chu nimin khan a tlangzarh ta.
Kum 2013 khan Aurora, Colorado-a mi, kum 18 mi lek, nula chhe lo leh duhawm tak Isabella Guzman chuan a nu Yun Mi Hoy chu a that a, vawi 151 lai a vit niin an sawi. Isabella Guzman court-a a inlan lai video hi tunhnaiah TikTok kaltlangin a viral nasa hle a, chu video-ah chuan 'Sweet But Psycho' hla 'dubb' a ni a, Guzman chanchin nen pawh a inmil hle. Chu hla 'Sweet But Psycho' satu Ava Max chuan nimin khan a album hmasa ber a tlangzarh a, streaming platform hrang hrangah ngaihthlak theihin a awm tawh a, Ava Max a zai thiam bawk a ngaihthlak manhla tak a ni hlawm.
Ava Max hian 'Sweet But Psycho' hmang hian kum 2018 khan rimawi khawvela mi bik a nihzia a rawn lantira, a hla tihchhuah hmasa niin hla pakhat lek hmangin khawvelin a hmelhriat nghal. A hla hmasa ber a 'hit' cher cher bawk a khawvelin a hrechiang a, album a tlangzarh hma hauh aṭangin rimawi khawvela lar berte zinga mi a ni der tawh.
'Sweet But Psycho' hi ram 22 chart-ah No.1 a ni thei a, ram 14-ah platinum certification a hmu bawk.
'Heaven & Hell' chu
'Sweet But Psycho' a tlangzarh hnu lawk khan ram hrang hrangah tour a nei nghal a, kumtawpah, Krismas dawnah an khuaah haw leh chiahin hemi hnu hian a album thar tur hi a buaipui chhunzawm nghal a, nikum chhung khan a tlangzarh hman beisei a ni a, mahse a tlangzarh lawk lo a; hripui lengin a tibuai ve bawk nen nimin khan a tlangzarh ta chiah a ni.
A album thara mi hla pasarih lai chu single-in a tichhuak tawh a, a 'hit' hlawm hle nghe nghe. 'Heaven & Hell'-ah hian track 15 lai a awm a, chung zingah chuan kan hriat lar sa tur 'So Am I' leh 'Kings & Queens'-te pawh a tel.
Ava Max album thar hi bung thuma ṭhen hran theih a ni a, Heaven, Purgatory, leh Hell angin a ṭhen hran theih a, heng bung tinte hian awmze hrang an nei ṭheuh a ni.
"Heaven section hi chu a energetic bakah upbeat lam, anthemic leh hlimna lam a ni a, Hell section hi chu a moody a, a theme a dark deuh bakah lungchhiatna lam hla a ni thung," tiin Max chuan a sawi.