Lady A vs. Lady A
American blues singer Lady A (a hming tak erawh Anita White) chuan US, Washington State-a Seattle khuaa District Court-ah American country music group Lady Antebellum ni ṭhin Lady A tia an hming thlakte lakah thubuai a thehlut.
Thubuai a thehluh chhan hi a hming Lady A ang chiah, Lady Antebellum-in an group hminga Lady A tia an lo hman ve vang a ni a, Lady Antebellum hian kumin June 11 khan an pawl hminga "Antebellum" tih chu sal neih hunlaia bawih lam thil sawina a nih avangin an thlak a ni.
Lady A (Anita White) hian court-a thubuai a thehluhah hian Lady A tih hming chu kum 30 chuang a lo hman tawh thu a sawi a, Lady A ni chung hian album paruk lai a lo thlangzarh tawh thu pawh a sawi. A hming Lady A tihah hian trademark a neih thu a sawi a, internet-a a inzawn dawnin Lady Antebellum zawk an lo lang fo ṭhin chu a duh lo hle tih a sawi bawk.
Hemi chungchangah hian Lady A (Lady Antebellum) chuan thuchhuah an nei rih lo a, a hmaa (July thlaa) thuchhuah an lo neih sa tawhah chuan an pawl hming thlakna hi court-ah phalna an nghak mek tih an sawi. Lady A (Anita White) chuan $ maktaduai 10 chawitir turin court-ah chu a phut a ni.