Donald Trump vangin Miss Universe-ah buaina a awm

US president thlan tur, primary election an neih tura Republican party president candidate nih ngei tum Donald Trump chu a campaign-naa a thusawi avangin Miss Universe-in buaina a tâwk chho dawn a, a tâwk ṭan tawh bawk. Mexico chuan Miss Universe-ah an nulate an inlan dawn lo tih a puang chhuak a, TV-a Miss Universe tichhuaktu, NBC chuan Miss Universe nena an thawhdunna a titawp. Hei bakah hian an co-host-te an bâng bawk.

Kum 1996 aṭang khan Miss Universe Organisation hi Donald Trump hian a nei a, hemi hnuaiah hian Miss USA leh Miss Teen USA te pawh an enkawl nghal bawk. National Broadcasting Corporation nen kum 2003 aṭang khan an thawk dun a ni.

Donald Trump hian a campaign-naah Mexico chungchang leh Mexican chungchang a sawi nasa hle. Mexico aṭang hian US-ah an pem lut nasa hle a, Mexico aṭanga pemlut hi US thil buaipui nasat ber zinga mi a tling. TV-a an kawmnaah Trump hian, "Mexico-in a mite a rawn thawn luh hian, a mi ṭha leh chhuanawm ber ber a rawn thawn lo a, buaipuiawm tak tak hlir a ni rawn lut ṭhin. Ruihhlo an rawn keng lut a, sualna an rawn tipunlun a, pawngsual hmang an ni," a ti. A hnuah Twitter-ah, "Mexican te hi ka ngaina a, mahse Mexico erawh hi chu ka ṭhian a ni lo. Ramriah min that a, hna leh sumdawnnaah kan lu min laksak a ni," a ti leh bawk.

Miss Universe aṭangin Mexico a inhnukdawk

Mexico chungchanga Donald Trump-a thusawi avangin Mexico chuan Miss Universe-ah an ram aiawh an kaltir dawn lo tih an sawi chiang ta.
Mexican nula zinga Miss Universe hmasa, kum 1991-a Miss Universe lukhum khum, Lupita Jones chuan, "Keini Mexican tan chuan hetiang thusawi hi chu pai daih har tak a ni. Miss Universe ka lo nih tawhna aṭanga thlirin, Donald Trump hian he organisation tan pawi nasa tak a khawih a, a hming a tihliau nasa hle a ni," a ti.
Mexico-a Miss thlan buaipuitute chuan Miss Universe-ah an ram nula an tir dawn lo tih an puang chhuak a, hemi hma lawk hian Mexico-a media lian berte zinga mi, Miss Universe pe chhuak ṭhin, Televisa chuan Miss Universe an tichhuak dawn lo tih an puang bawk. Televisa chuan, "Trump hian Mexican mi pemlutte zahna leh khawngaihna pakhat mah a neih loh mai bakah, Mexican zawng zawngte pawi nasa takin a khawih a ni," a ti.

Host-te an bâng

Miss Universe thlan tura host pahnih chu a neitu ber zinga mi Donald Trump-a thusawi avangin an bang.
Host tur zinga mi Cheryl Burke chuan co-host a nihna chu a kalsan tih a puang a, "Tun hnaia Donald Trump-a thusawi leh, a hnuah NBC-in ani nena an inzawmna a chhut chah takah chuan, co-host tan pawh rilru thiang tak hman a harsa a, chuvang chuan ka nihna hi ka kalsan ta a ni," a ti. Thomas A Roberts pawhin a bang tih a sawi. A hmain Roselyn Sanchez leh Cristian de la Fuente te chuan an inhnuhdawh thu an lo sawi tawh bawk a, anni pahnih hi Spanish ṭawnga ti tur an ni.
Zaithiam, Natalie La Rose pawh a inhnukdawk ve nghal. La Rose mentor, Flo Rida chu Miss Universe show-a zai tur a ni a, ani hi chuan a tihlawhtling dawn a ni mai thei, engmah a la sawi chhuak lo.

NBC an inhnukdawk
Miss Universe an kalpui tho dawn

Kum 2003 aṭanga Miss Universe thlana Donald Trump-a thawhpui, NBC chuan Miss Universe chungchangah a thawhpui dawn tawh lo tih an tarlang. Miss Universe thlan erawh chu ruahman tawh sa angin July 12 aṭang khian Baton Rouge-ah ṭan a ni tho dawn.
Miss Universe Organization chuan, "Tun hnai thil thleng avang hian kan rilru chu a hrehawm viau a, amaherawhchu show erawh kalpui a ni tho ang. Miss Universe hi hnam hrang hrang inpumkhatna leh lenna a ni a, chutah chuan a thupui pawh a la innghat reng a ni," a ti. "Khawvel politics leh thil dangin nghawng chu a nghawng ngei ṭhin a, mahse heng zawng zawng kal pel a, hmalam pan zel hi a tum a ni," a ti bawk.