Actress sum lalut hnem ber Jennifer Lawrence
Forbes chuan khawvela actress zinga sum lalut hnem ber a tarchhuak leh tawh a, chung zingah chuan Jennifer Lawrence-i'n sum a lalut hnem ber. Sum lalut hnem 10 tarlanah hian Indian actress Deepika Padukone pawh a lang pha.
The Hunger Games-a a changtunu Jennifer Lawrence hian film lian tak tak a chang hnem a, hei hi a sum hmuhna lian a ni. Thla 12 chhungin USD mtd 46 zet a lalut hman a, a lakluhna lian, movie-ah chuan The Hunger Games: Mockingjay Part 2 leh X-Men: Apocalypse te a ni. Hei bakah, la chhuak tur, Passengers film-ah a chang bawk.
Jennifer Lawrence hian sum lalut hnem ber ni mah se, nikuma a sum lakluh aiin kumina a sum lakluh hi a tlem zawk. Nikum khan USD mtd 52 zet a lalut a, a lakluh tlakhniamna hi za zelah 11.5 zet a tling. A sum hmuh hi tlem zawk mah se, Lawrence hi actress sum lalut hnem tarlan zingah a la naupang ber a, kum 30 hnuai lam, Forbes list-a lang awm chhun a ni. Showbiz hrim hrim chhunga hmeichhe sum lalut hnemah thung chuan Jennifer Lawrence hian Taylor Swift a pha lo hle.
Ghostbusters-a a changtunu, Melissa McCar≠thy chu sum lalut hnem pahnihna a ni a, thla 12 chhungin USD mtd 33 a thawk chhuak hman. A sum hmuhna lian ber chu Ghostbusters film hi a ni. Lawrence nena an danglamna chu, McCarthy hi nikum aiin kuminah sum a lalut hnem. Nikuma a sum lakluh aia kumina a sum lakluh tam zawkna hi USD mtd 10 zet a tling a ni.
Nikuma pahnihna Scarlett Johansson chu kuminah pathumnaah a chhuk thla a, McCarthy hian a rawn khum. Johnsson hian thla 12 chhung khan USD mtd 25 zet a hlawh chhuak. Johansson sum hmuhna lian chu Marvel movie-a Black Widow-a a channa hi a ni ber.
Sum lalut hnem 10 tarlan zingah Asian mi an lang ve ta nual mai a, hei hian Hollywood pawh a huam a zau ve tawhzia a lantir. Sum lalut hnem panganaah Chinese actress Fan Bingbing a lang a, 10-naah Indian actress lar Deepika Padukone pawh a lang. Lang pha lo zingah Sandra Bullock leh Angelina Jolie te hi a langsar an ni a, Bullock hi kum 2014 khan sum lalut hnem ber a lo ni tawh a, Jolie hi kum 2013 khan sum lalut hnem ber a ni thung.
Actress sum lalut hnem 10
Jennifer Lawrence - $mtd 46
Melissa McCarthy - $mtd 33
Scarlett Johansson - $mtd 25
Jennifer Aniston - $mtd 21
Fan Bingbing - $mtd 17
Charlize Theron - $mtd 16.5
Amy Adams - $mtd 13.5
Julia Roberts - $mtd 12
Mila Kunis - $mtd 11
Deepika Padukone - $mtd 10