Xiaomi Redmi Note 4 thung le

Xiaomi chuan Asia-a mobile phone-a sumdawnna kawnga an huang zauh belh zelin, tunhnai khan China-ah Redmi Note 4 an phochhuak leh ta. Engtikah nge India bikah lei theih tura an zawrh chhuah ang tih erawh sawi theih a la ni lo.

Redmi Note 4 hi chi hniha siam a ni a, pakhat chu 2GB RAM, a storage 16GB a ni a, India pawisaa Rs. 9,000 man vel tura ngaih a ni. Pakhat leh hi 3GB RAM, storage len zawngah 64GB a ni a, Rs. 12,000 vel tura beisei a ni. China-ah chuan tunkar Zirtawpni aṭang hian an zuar chhuak ang.

Redmi Note 4 hmai hi inchi 5.5-a hlai a ni a, a display hi 1080 x 1920 pixel a ni a, 2.5D curves glass hman a ni. A processor hi a ṭhat hmel hle. Media Tek Helio X20, deca core a hmang a, graphic-ah hian Mali-T880 MP4 GPU a hmang bawk. A pahnih hian memory card a vuah theih ve ve.

MIUI 8 a hmang nghal dawn a, a OS hi Android 6.0 Marshmallow a ni. SIM slot hi hybrid a ni a, Micro SIM pahnih a dah theih a, SIM pahnih hmang duh lo tan microSD card a vuah nghal theih dawn a ni. Fingerprint scanner a awm. Camera pawh phase detection autofocus-a thuam, 13 MP leh 5 MP te a nei. A battery a ṭha hle a, 4100 mAh a hmang.