It's My Life - Bon Jovi

Mizoramah pawh a hlaten play an hlawh a, Crossroad phei kha chu kan duh zual emaw tih mai tur a ni; mahse mi tam tak ngaihah chuan Bon Jovi band hi band hlui an ni. Chutianga mi tam takin an ngaih lai chuan, kum 2000 khan an hla hit 'It's my life' hmangin an rawn thleng thei tlat. Hei hian band daih rei tak, mi tam takin chuai tawh lam nia an ngaih, Bon Jovi band a la chuai lohzia a tilang.

Kum 1995-a 'These Days' album an tihchhuah kha Bon Jovi band anga an tihchhuah hnuhnun ber tur emaw an ti tawh a; a hnu lawk, kum 1997-a Jon Bon Jovi-a'n solo album a tihchhuah leh khan Bon Jovi band chu chawl tawh tur≠ah mi tam tak chuan an ngai nghet tlat a ni. Chutianga khawvelin an ngaih lai chuan kum 2000, May 23 khan an album, Crush tihlar lawk nan khawvela hla hit pawl tak, Bon Jovi band tana kum sang bi thara hla hit ber tur "It's my life" hla chu single-in an rawn tichhuak mai ale, khawvelin Bon Jovi band a la ropuizia a hmu nghal a ni.

Ram hrang hrang chart-ah pakhatna a hauh nghal miah miah emaw tih mai tur a ni a, Belgium, Austria, Italy, Netherlands, Spain, Switzerland-ah te chuan single chart-ah pakhatna a rawn hauh a, US Billboard Hot 100-ah 33-na lai a thleng pha a, US Adult Top 40-ah 11-na a thleng pha bawk. He hlaah hian Bon Jovi band music genre, Glam Metal chu tlemin an kalsan ta deuh. "It's My Life" hla hmang hian Bon Jovi chu 80s glam metal band zinga kum 2000 hnu lama Billboard Hot 100 chart-a 40-na chung lam thleng thei tlem te zing≠ah a hlangkai a ni.

"It's my life" hla hi Bon Jovi, Richie Sambora leh Max Martin te hla phuah a ni a, a hlawhtling viau a ni tih a hriatna chu, kum 2001 September thlaa World Trade Centre beih a nih a, khami ṭuma tuarte
ṭanpuina concert-ah he hla hi an sa a, kum 2002 Winter Olympic-ah khan an play bawk.

He hla hian nghawng a nei lian hle. "It's my life" tih chu
ṭhalai, khawvel thila sah‚wkten an duhzawng tihna remchang leh chhuanlamah an hmang zui ta a. "Midang nunah inrawlh suh; hei hi ka nun a nia, nanga lo inrawlh vena tur a awm lo e. Ka duh duh ka ti ang," tih tlawh chhan berah an hmang a, sual tihna remchangah an hmang a, thununna p‚wna khawsak theihna tur chhuanlamah an ngai a ni.

Hetianga miin anmahni duh ang ang an tih theihna tur chhuanlama an hmang hi amah Jon Bon Jovi ngei pawh hian a lo beisei lo hle a, "'It's My Life' ka phuah lai hian keimah leh khatihlaia ka nun ngawt kha ka ngaihtuah a ni. 'It's My Life' tih hian hetiang khawp hian mite a hneh ang tih ka ring loa ka ngaihtuah hek lo. Ṭhalai te, upa lam leh eng mi mai pawhin anmahniah an lalut a, 'Hei hi ka nun a ni a, keima thu thu a ni' tiin he hla aṭang hian an ngai a ni," a ti.

A hla thu zawng zawng chipchiarin kan sawi zui kher lo ang; chatuanin kan dam dawn chuang lo a, mahse hei hi ka nun a ni a, ka dam chhung hi chuan ka duh anga nun mai ka duh tih vel a ni a, a thunawnah hian Frankie tih a lo lang a, hei hi musician ropui Frank Sinatra sawina a ni a, ani leh Jon Bon Jovi te hi New Jersey chhuak ve ve an ni. Jon Bon Jovi chuan, "Sinatra hian movie 16 a siam bakah kum 80 a nih thlengin concert tour a nei thei a, ani hi ka entawn leh amah ang nih ka tum a ni," a ti.

Individualism ropui zawkna aṭang chuan Collectivism ropui zawkna ram, Asia pawh 'It's my life' hian a rawn lut chho a, ngaihthlak a hlawh hle. Mahse khawthlang nun leh kan nun a inang lo tih erawh hriat a ṭha. Keini zawng, kan hnam a damkhawchhuah theih nan kan inngaihtuah tawn a, kan thawhho leh nunho a la ngai. Anni chu damkhawchhuak a, khawvel awptute an ni a, mahni chauh inngaihtuah≠na khawvelah pawh an hnam leh ramin a tuar hran tawh lo e.