Kari Jobe 'The Blessing' live album October-ah

Dove award eng emaw zat dawng tawhtu Gospel singer lar Kari Jobe chuan October 23 hian live album thar 'The Blessing' a tlangzarh dawn.

Kari Jobe hian kum thum lai mai album a tlangzarh tawh loh hnuah 'The Blessing' a tlangzarh dawn thi hi a sawi a, social media kaltlanga a album thar tur chungchang a tarlannaah pawh a phur tawh hle.

Instagram lamah a follower-te chuan a album tlangzarh thar tur chu a phur tawh hle tih an hre thei ang. "Khawvel hmun hrang hranga mite'n an chhungkua, an kohhran leh an rama malsawmna an dawn chungchang enin vawi tam tak ka ṭap tawh. Pathian hi a thutiama ding nghet Pathian a ni a, chu chu Bible-ah pawh a inziak a ni. A inthlak danglam ve ngai loh na leh kan tan kan kianga a awm rengna hi ka ngaina  a ni. Hei hian muanna nasa tak min thlen a, a bik takin kan duh lo anga thil a kal hunlai leh, kumin anga hlauhna nena hun kan hman lai hian. 'The Blessing' hi thudik niin kan nun, chhungkua leh midangah kan puang thei a ni," tiin a album thar tur chungchang hi phur takin a sawi.

Kar hmasa chhung khan a album thara mi tur hla pathum  "First Love," "Embers" leh "Obsession (ft. Cody Carnes),"-te chu a drop tawh a, YouTube-ah thlira ngaihthlak theihin a awm tawh bakah streaming platform hrang hrangah a stream theih tawh bawk a, worship hla ṭha tak tak a ni hlawm a, a album puma ngaihthlak theih hlan a nghahhlelhawm hle.

Album title hla 'The Blessing' hi a pasal Cody Carnes leh  Elevation Worship member Furtick leh Brown-te nena an phuah a ni a, hripui len tak tak hma lawka an phuah niin,  video pawh an dah chhuahna a rei tawh a, global audio stream-ah stream maktaduai 57 vel lai a nei tawh.

Zaithiam leh worship leader ṭha tak ni bawk Jobe hi kum 20 dawn chu Gospel music huangchhunga zaithiam hriat hlawh ber pawl a ni tawh a, kum 13 a nih lai aṭang tawhin worship a kaihruai tawh a ni. Dove award pali lai dawng tawhin Grammy-ah nominee-te hial pawh a ni tawh a, RIAA Gold-certified single-te pawh niin album copy maktaduai 1.5 chuang a hralh tawh a, streaming service hrang hrangah a hlate chuan stream tluklehdingawm chuang an nei tawh a ni.

Kum 39 lai ni ve tawhin Carnes nen hian fa pahnih an nei tawh a, studio album panga a tlangzarh tawh bawk.