Francis-a hla thar a nalh leh dawn

'Thinlung khaw­ngaih­thlak' hmanga thiam taka Zofate min awitu Francis-a chuan zanin hian hla thar a tichhuak leh dawn a, ngaihthlak a manhla lehpek dawn tih a chiang.

Francis-a hla thar hi 'Lung min lentu' tih a ni dawn a, Inrinni lamah khan Instagram kaltlangin a hla thar tihchhuah tur chungchang hi tarlangin teaser video pawh a dahchhuak nghal a, a zai ngainatute tan chuan a nghahhlelhawm hle ang.

Teaser video aṭang hian Tuaitea hla 'Hmelṭhate'-a model chhe lo tak Ruatpuii Bawitlung kha a kan hmu leh dawn tih a hriat theih a, music video awmze nei tak a ni dawn tih a chiang bawk. Retro lam hawi a ni dawn a, a music chu a hmanlai deuh ruih mai thei tih Francis-a chuan a sawi.

Tluanga Hnamte, WestEnd recording nen music hi an siam dun a ni a, Malsawmkima Pautu chuan guitar perhsak thungin video chu JonMizo Visuals kut chhuak a ni a, Francis-a hla pangana a ni ve tawh dawn bawk.

"He hla hi February thlaa ka phuah kha  a ni a, inngaizawng em em chanchin a ni tawp mai. Ngaihzawng atchilh bur neih chungchang a ni deuh ber," tiin a hla thar tur chungchang hi Vanglaini a hrilh. Zanin hian a YouTube channel (francis official ba dum tss)-ah a dah chhuak dawn a, Francis-a zai ngainatu i nih chuan hmaih chi a ni lo ang.

A hla hmasa ber 'Thinlung Khawngaih­thlak' khan YouTube-ah thlirtu maktaduai 3 dawn thuak a nei tawh a, Ruatfeli leh Naupang Kawlhrang a thawhpuina hla 'Thawnthu Lungchhiat­thlak Ber' pawh khan thlirtu mtd 2.9 chuang a nei tawh bawk a ni.