Lancy-in video thar a tichhuak
'Min hruai zel ṭhin' tih hla, Kristian hla ṭha tak mai, Ṭhazual chart-ah pawh hlawhtling em em a tihchhuah hnuah, 2013 Mizo Idol top 3, Lancy Remlalhruaii chuan music video dang a peih leh tawh a, he a video thar hi zanin dar 6:50 hian Zonet-ah tihchhuah ṭan a ni ang.
Kristian hla ṭha tak hmanga TV lama bul a rawn ṭan hnuah Lancy-i music video thar tur thung hi chu lenglawng lam hla a ni daih ang. Lancy-i music video thar hi 'Mangṭha' tih a ni a, ṭhian inngaihna lam hla a ni ang. Lenglawng lam a sak leh daih chungchangah Lancy-i chuan, "Nia, a hmun azirin lenglawng hi chu ka sa ve zeuh zeuh ṭhin. Lenglawng hla ṭhenkhat hi chu hla ṭha tak tak, zirtir nei ṭha tak tak a ni," a ti.
Tuna a video thar hi amah Lancy-i hian a chhuang hle a, "A music hi ka duhzawng tak a ni a, ka ngaihthlak chian phei hi chuan keima lung tak te hi a tileng ṭhin," a ti. An uluk hle a, kumin January thla aṭanga an buaipui daih tawh kha a ni a, tunah an peih chauh. "Kan peih harna chhan chu a video hi kan uluk hle a ni," tiin Lancy-i chuan a sawi. An buaipui rei a, an uluk a, an duh ang taka an siam a ni bawk a, a hla hrim hrim mai bakah a video leh music pawhin belhchian a dawl khawp ang.
Programme a ngah a, Serchhip lamah pawh a awm hman meuh lo. KṬP Meet hmangin a haw zawk tih mai loh chu hawna hman pawh a nei meuh lo. "Programme ka ngah a, function neuh neuha zaina tur a tam hle a, mahni in lam pawh kan tlawh hman meuh lo," a ti. A hriselna a ṭha a, mahse a chang chuan hunawl a neih loh avang leh, a zai nasat avangin a taksa a chau ṭhin hle tiin a sawi bawk.
'Mangṭha' tih hi Lancy-i music video pathumna tur a ni. 'Min hruai zel ṭhin' tih hla a tihchhuah hnu khan, hman deuh lawk khan 'Min kai la, min hruai rawh' tih video a siam leh a; he hla hi Lalremruata (Mapuia) Dawrpui venga mi phuah a ni. Tunah hian hmachhawp a ngah ang reng a, Anggu's collection-a mi tur an buaipui mek a, hei bakah hian hla dang pakhat, ama pual liau liau tur bawk an siam a, chu bakah chuan fam ngaih hla lampang, siam tur hmachhawp a nei nual.