Breaking Benjamin an rawn par leh ta

Kum 2009-a Dear Agony an tihchhuah a, Billboard album chart-a palina an luah hnu kha chuan an hit ta vak lo pawh ni loin an thawm a reh viau a, mahse a thiam ngai chu an lo la thiam tho mai. Billboard album chart-ah Breaking Banjamin chuan pakhatna an rawn luah leh.

Breaking Benjamin hian an studio album pangana, Dark Before Dawn hmangin album chart-ah hian top an rawn hauh. He album hi kar khat chhungin copy 141,000 zet an hralh a, heng zinga copy 135,000 chu album pangngai a ni. Kum 2009-a an album, palina hauh thei 'Dear Agony' kha kar khat chhungin copy 134,000 an hralh a, hemi hmaa mi, kum 2006-a an tihchhuah, Phobia kha kar khat chhungin copy 125,000 an hralh.

Tori Kelly album, Unbreakable Smile chu pahnihnaah awmin, tunkar chhung khan copy 75,000 an hralh a, heng zinga copy 65,000 chu album pangngai a ni. Kacey Musgraves chu pathumnaah awmin, ani hi Billboard album chart top 10-a rawn lang thar a ni a, a album 'Pageant Material' chu kar khat chhungin copy 60,000 a hralh.

Taylor Swift chu palinaah a la lang thei a, a album 1989 hi tunkar chhung khan copy 54,000 lai a hralh belh leh a ni. Panganaah kar hmasaa pakhatna James Taylor chu awmin, a album 'Before This World' chu copy 50,000 a hralh.