Zualbawihi album thar kar lehah

Kum 2012-a 'A na asin' album a tihchhuah hnua a album puitling leh hmasa ber tur chu R. Lalhmangaihzuali, Zualbawihi tia kan hriat hian kar leh Thawhlehni khian a tlangzarh dawn. He album hi music video album tur a ni ang a, a album hming tur hi 'Vul reng rawh' tih a ni ang.

Zualbawihi album tharah hian hla 20 a awm dawn a, heng zinga 17 te chu music video a ni ang a, Krismas hla pawh a tel ang. Mi tam takin album an tichhuak ngam tawh lo a, hei hi Mizo mipuite khingbai deuha hma kan sawn avang leh, material-ah chauh hma kan sawn a, rilru lama hma kan sawn tel loh vang a ni pakhat. Piracy kan chin avangin zaithiamte tan album tihchhuah a huphurhawm tawh. Hetiang karah hian Zualbawihi chuan album a tichhuak dawn tho a, ani hi chuan hlawkna ûm loin, document tur a duh avangin album hi a tichhuak dawn.

'Vul reng rawh' album aṭanga hla ṭhenkhat hi chu TV lama kan hmelhriat tawh sa a ni ang a, hla thar pawh a awm nual dawn a ni. Lengzêm mai bakah nungcha leh ramngaw humhalhna lam, evironment lam kaihhnawih hlate pawh a awm ang. A album hmasa kan hria a, tuna mi pawh hi a chhe hauh lo ang.