The Rock Actor sum lalut hnem ber
Wrestling khawvel ai chuan movie khawvelah hian sum a lo tam zawk a ni. Forbes-in khawvela actor sum lalut hnem a tarlanah wrestling khawvel aṭanga kan hriat lar, Dwayne 'The Rock' Johnson chu actor sum lalut hnem ber a ni. Sum lalut hnem 10 zingah Shah Rukh Khan leh Akshay Kumar te chu an lang pha a, lalut hnem 20 zingah Salman Khan leh Amitabh Bachchan pawh a lang.
Fast and Furious-a hlawhtling taka chang The Rock hian kum danga pakhatna lo luah ṭhin Robert Downey Jr. chu a rawn khum a ni. Nikum aiin kumina The Rock sum lakluh hi a let thawkin a pung a, tun thla 12 chhung khan USD mtd 64.5 zet a lalut a ni.
The Rock sum hmuhna langsar ber chu Central Intelligence film leh Fast 8 te kha a ni a, heng movie pahnihte hi box office-ah pawh an turu hle a nih kha. Hei bakah hian Baywatch an siam thar lehah a chang bawk a, he film hi la tihchhuah loh a ni. Nikuma tihchhuah, San Andreas aṭang ngawt pawh khan sum a lalut hnem hle.
Chinese actor lar Jackie Chan chu sum lalut hnem pahnihna a ni. Thla 12 chhungin Jackie Chan hian USD mtd 61 ngawt a hlawh chhuak thei. Hollywood lamah chuan a film thar hmuh tur awm vak lo mah se, China lamah erawh chuan Jackie Chan film a hit thei hle. Monkey King franchise-ah a chang a, heta ṭang hian sum a thawk chhuak hnem hle a ni. Hei bakah hian film production lamah pawh a inhmang chho nasa hle.
The Martian a hlawhtling a, he film-a a changtupa Matt Damon pawn sum a lakluh hnem phah a, USD mtd 55 ngawt a lalut. Jason Bourne-ah a chang leh a, chu bakah chuan China leh Hollywood lam film siam The Great Wall te hi a sum lakluhna lian a ni.
Forbes-in sum lalut hnem a tarlan zingah hian Indian actor an lang nual mai a, hei hian Bollywood-a sum tamzia a lantir awm e. Shah Rukh Khan chu sum lalut hnem pariatnaah a lang pha tlat mai a, thla 12 chhunga a sum lakluh hi USD mtd 33 lai a tling. Dilwale film kha a hlawhtlinpui a, hei bakah, a channa film reng reng a hlawhtling em em vek. Movie mai bakah hian fashion brand hrang hrangte nen sumdawnna kawngah an thawkho a, a sum lakluh pawh a tihpun phah hle a ni.
Thla 12 kalta chhung khan Indian actor hlawhtling Akhsay Kumar hian USD mtd 31.5 lalutin, khawvel huapa actor sum lalut hnem 10 zingah 10-naah a rawn lang thei. Forbes-in an sum lakluh an chhut hun chhung hian movie hit deuh deuh pathum lai mai a nei hman. Hei bakah hian Honda motorcycle nen an thawk dun a, bawnghnute kaihhnawih siam chhuaktu company te, loan pe chhuak ṭhin company leh company hrang hrang nen an thawkho bawk.
Salman Khan chuan USD mtd 28.5 thawk chhuakin 14-naah a lang a, Amitabh Bachchan hian kum khat chhungin USD mtd 20 thawk chhuakin 18-naah a lang pha bawk.
Actor sum lalut hnem 10
Dwayne "The Rock" Johnson - $mtd 64.5
Jackie Chan - $mtd 61
Matt Damon - $mtd 55
Tom Cruise - $mtd 53
Johnny Depp - $mtd 48
Ben Affleck - $mtd 43
Vin Diesel - $mtd 35
Shahrukh Khan - $mtd 33
Robert Downey Jr. - $mtd 33
Akshay Kumar - $mtd 31.5