Cindy-i'n pakhatna a luah

Amtea aia thlan mipuiin kan nei ta. JJ Store Dalda Ṭhazual Fakna 10-ah Cindy Lalramhlimawmi'n Amtea a rawn nek chhuak a, pakhatna ṭhutphahah a rawn ṭhu ta.

Kum 2015 Mizo Idol aṭanga kan hriat lar, Armed Veng South nula, Cindy Lalramhlimawm≠i hi a music video hmasa ber hi a rawn hlawhtlinpui nghal thei. Mizo Idol-ah amah aia thleng sang tam tak awm mah se, hlawhtlin zui zelna chu ṭum khata thlen san hluai ni loin, tihzui peih a nihzia Cindy-i
aṭang hian a lang.

Cindy Lalramhlimawmi music video hi 'Aw Thlarau Thianghlim' tih a ni a, July 4-a chart tihchhuah
aṭang khan kan hmu ṭan chauh a, thla khat a liam hnu chuan pakhatna a luah thei a ni. July 4-a Fakna chart tihchhuahah hian pariatnaah Cindy hian bul a ṭan a, a bul ṭanna a ṭha hle. July 18-a chart tihchhuah lehah kha chuan pangana a rawn kai chho a, Aug. 1 kha chuan pathumna a thleng tawh. Aug. 15 kha chuan pahnihna a thleng chho a, tunah chuan pakhatnaah a ṭhu ta a ni.

One in Christ chuan pakhatna an hnaih leh hle tawh. Tunhnaia album tichhuaktu One in Christ hian 'Min chhungkhat leh ṭhin' tih hla hmangin pahnihna an luah a, Amtea chu pakhatnaa vawi thum a awm hnuah pathumnaah a chhuk thla ta thung. Pakuana aṭangin Stacy VL Muanpuii hla 'Hnehna hla mawi' chu palinaah a rawn chho a, pathumna aṭangin Estheri Khiang≠te chu panganaah a tla thung.

Top 10-ah hming thar pahnih kan hmu. Mizo gospel singer kan neih ṭhatte zinga mi, Andrew Lal≠tlankima chu hun rei tak a music video kan hmuh loh hnuah, a hla hit hnuhnung zinga mi, 'Nunna thar' hla hmangin pariatnaah bul a rawn ṭan. He hla hi audio-a a tihchhuah hlim aṭanga a hlawhtlinpui mek a ni a, a la hlawhtlin zel a rinawm. Thelma-i chu 'Isu i hnena awm ka duh' hla hmangin top 10-ah kan hmu bawk.

Stacy hla dang, 'Khawngaihna thing kraws' chu top 10 aṭangin a chhuak a, Zorinsanga Sailo hla 'Chhandamtu ngilnei' tih pawh kan hmu ta lo bawk.