Arunachal-ah 'MI BO' in ngaihhlut hlawh

Arunachal Film Collective bultuma February 9, 2025 tlaia Reel Affairs huaihawtah Mizo film, 'MI BO (Missing Person)' tih chu en hoa zir hona neih a ni. He hun hmanga kalkhawm ten an hlut hle.

India rama film siamtu ṭha tak takte an lo sawm tawh ṭhinna, Arunachal Film Collective-ah hian 'MI BO (Missing Person)' film director Raymond Colney leh a changtunu Zoparmawii te chu chhim tur hian sawm an ni a, zawhna leh chhanna hun siamah pawh hunin a daih loh hial khawpin an hlut a ni. He hunah hian Arunachal Pradesh-a film siamtu ṭha tak tak an kalkhawm a ni. Raymond leh Zopari te hi Itanagar Mizo Welfare Association chuan an lo ṭawiawm a ni.

"Kan rin phak bakin min hlut a, fiamthuah an nui a, ṭah hunah an ṭap veleh thlap a, khatiang em em khan Mizo film an hrethiam ve ang tih ngaihna ka hre lo” tiin MI BO film director, Raymond Colney chuan Vanglaini a hrilh.