Bulgari Global Ambassador thar LISA

Luxury brand Bulgari (BVLGARI tia hriat lar bawk) chuan Blackpink member Lisa chu an global ambassador a nih thu Zirtawpni liam ta khan an puang.

Lisa hi K-Pop star zinga Bulgari global ambassador hmasa ber a ni a, luxury brand lar Bulgari chuan Lisa fashion icon  a nihna anga duhawmna leh a hmelṭhatna khawvela lar mek chu an brand nihphung nen a inmil hle tih sawiin, chu chu an official brand am­bassador atana an thlan chhan pawh a nih thu an tarlang.

Kumin July thla aṭang khan Lisa leh Bulgari hian inkungkaihna an nei ṭan a, Bulgari brand-in digital campaign an kalpui "Serpenti" leh "Bzero One"-ahte khan lo tel tawhin hei hi an collection thar atana an campaign a ni. Hemi ṭum hian Lisa hian Bulgari tlereuh mawi tak tak inbela a thlalak a pholang a, a fan-te'n an lawm hle nghe nghe. Khatih hunlai khan Lisa hi Bulgari hian an brand ambassador zinga mi a nih thu an puang ringawt a, tunah erawh an official global brand ambassador zinga mi a ni tawh thung a, a fan-te chuan a thlalak leh a video-ahte Bulgari product a inbelna an hmu zeuh zeuh tawh dawn a ni.

Nikum November thlaah khan Penshoppe family ambassador a nih thu puan a lo ni tawh bawk. Penshoppe hi Phillipines-ah chuan clothing brand lar tak a ni. Hemi hnu hian Blackpink member Lisa hian Billboard leh mall advertisement-ahte an thawmhnaw a ha fo.

Khawvela sports brand lar ber zinga mi Adidas pawhin Lisa hi an thawhpui. A labelmate Mino nen Adidas tan hian endorsement model an ni a, hetah erawh hi chuan amah chauh ni loin Blackpink-a a ṭhian dangte pawh an thawhpui a ni.

Fashion brand chauh ni lo pawh a thawhpui bawk. Nikum July thla aṭang khan  AIS Thailand brand ambassador a ni bawk a, AIS brand presenter zinga hlawh an pek tam ber a ni hial a, amah Thai a lo ni bawk nen an brand a fak sakna chu Thailand-ah chuan 'highest-rated commercial' a ni hial!

China lamah pawh Lisa hi a lar hle a, chumi avang chuan D&G Downy China chuan May thla khan an brand spokeperson atan an hmang a, chumi thla vek chuan China-a dairy company lian ber Mengniu Dairy leh an yogurt brand Zhengouli chuan an  brand spokesperson thar a nih thu an puang zui bawk.

Nikum July thla khan mobile game Ragnarok M: Eternal Love chuan endorse­ment model-ah an lo hmang tawh a, Midnight Party-ah pawh character pakhat a ni tel bawk. China-ah hian Lisa hi Supercell mobile vidoe game 'Brawl Stars' spokesperson thar ber  a ni bawk a ni.