Rockschool Virtual Performance Exam result a chhuak

Covid-19 hripui a len vangin nunphung a danglam zo a, RSL music exam pawh London lam aṭangin examiner-te an lo kal theih loh avangin video hmangin exam an buatsaih. Candidate-te'n an grade exam tur syllabus-a mi hla panga a indawtin an sa/tum lai video chu theh lutin, London lama examiner-te'n an lo endik leh thung. 

Kuminah hian Canorous Music Academy Keifang, Legato School of Music Champhai, RL Chords Serchhip, Synod, Drop Doubt, Mystique Music school Aizawl aṭangtein zirlai engemaw zatin exam hi an hmachhawn a, kum dang zawng aiin result a ṭha. Exam hmachhawn 37 zingah 30 chu distinction-ah an pass a, mi paruk Merit-ah an pass a, hlawhtling zo lo 1 a awm thung. Kumina exam hmachhawn zingah hriathlawh tak tak an awm nual. Chung zingah chuan zaithiam lar Stacy VL Muanpuiin pawh telin Vocal grade 8 distinction-ah a pass a, mark 98/100 a hmu hial. Electric Guitar grade 8 distinction a pass zingah Eric Renza (The Prophets), Chama ( Sword Tune ), Puipuia (Besy choir conductor)-te an awm a, Mamawia (The Prophets) chuan Drums grade 8 distinction-ah a pass bawk. 

Rockschool hi 1992 a din a ni a, khawvel hmun hrang hrangah an syllabus hmang hian music exam an buatsaih ṭhin a, Classical Piano, Popular Piano, Keyboard, Acoustic guitar, electric guitar, drums, ukulele, vocal, music production, jazz dance, theater dance, street dance-ahte hian grade 8 leh diploma thleng a zir theih.