Ben Hur hlawhchhamna Mark Burnett leh Downey te tan beidawnthlak

Kum 1959-a movie hit em em, Oscar pawh ṭhahnem tak la thei Kristian film Ben Hur chu siamthar leh a ni a, tihchhuah a ni a, beisei a pha lo mai pawh ni loin, kumina movie chhuak zinga hlawhchham chiang ber anga sawi a ni hial.

Hetianga a hlawhchham chian avang hian he film buaipuitute zinga mi Mark Burnett leh Roma Downey te thinlung pawh a hnual phah hle. He mite pahnih hi Hollywood-ah chuan 'Kristian bengchheng/ ninawm' tia sawi an ni ṭhin. The Bible miniseries an hlawhtlinpui aṭang khan khawvel chuan he mite pahnih kut hnu hi a ngaihven lehzual a ni. Son of God tih, Isua film an tichhuak leh a, box office-ah pawh a hlawhtling hle. Mahse tun ṭum zet zawng, chet chhiatna lian a ni.

Downey chuan an film siam a hlawhchham avang hian Facebook-ah 'Lalpa, ka ruak vek a, nangin min chhung khat ang che' a ti hial. "Tunah chuan kan tih theih ang zawng zawng kan ti ve tain ka hria a, a bak chu Pathian kutah chauh a awm tawh a ni. Inbeihna ṭha chu kan bei a, a tawp kan thleng tawh a, tunah chuan kan rinna chauh kan hmachhuan tawh a ni," a ti.

Ben-Hur hi USD mtd 100 zet senga siam a ni a, box office-ah, tihchhuah chawlhkar khan USD mtd 11.2 chauh a lalut thei. US bakah ram dang 23-ah chhuah nghal a ni a, Kristian tamna hmun ṭhenkhatah chuan a che ṭha viau a, mahse heng ram aṭanga movie enna man aṭanga sum lakluh a sang ngai vak lo thung.

Khawvela Catholic ram lian ber, Brazil-ah chuan pahnihna a tling pha a, chawlhkar khat chhungin USD mtd 2.5 hu a hlawh chhuak; Brazil-a movie sum lakluh aṭanga chhut chuan a lakluh a tam viau a, mahse a senso aṭanga ngaihtuah chuan a tlem viau. Catholic ram lian ber dawttu Mexico-ah USD mtd 2.8 lalutin pakhatna a tling a, Venezuela aṭangin USD 817,000 a lalut a, Asia-a Kristian, a percent aṭanga chhuta tamna ber, Kristian zaa 90 aia tam awmna Philippines aṭangin USD 598,000 a hmu bawk.

Australia, Argentina leh Ne≠therlands-ah te eng nge a an tih a la hriat loh. Nakkum hian Germany, Austria, Spain, France, Russia, UK, Korea leh Japan-ah te tihchhuah leh a ni ang.