ṬHAZUAL FAKNA Maruati & Rla 'A hnai reng Isua' pakhatna a ni

Ṭhazual Fakna chart-ah Ma­ruati & Rla 'A hnai reng Isua' chu pakhatna a ni a, Dr. Zova 'Ka puang zel dawn' chu pahnihna niin Sanga Renthlei 'Lal Isua duhawm ber' chu pathumna  a ni bawk.

Maruati leh Rla'n thiam taka an sak 'A hnai reng Isua' hi chart hmasaah khan pahnihna  a ni a, chart-a a inlan aṭangin No.1 ni tur hian hun an hmang rei vak lo. Chart hmasa hma­sa leh lamah kha chuan pangana a ni a, chart hmasa khan pahnihnaah rawn inhlangkaiin tunah chuan pakhatna a ni der tawh.

June thla tawp lamah khan Maruati leh Rla-te hian 'A hnai reng Isua' hi an tlangzarh a, music video a hmuhnawm a, mit leh beng an titlai hle a ni. Z Lalduhzuala hla lehlin mawi tak hi a satute pawhin an sa thiam hle a, pakhatna dinhmun hial a thleng pawh hi an phu hle.

Dr Zoa hla thar 'Ka puang zel dawn' chu pahnihna a rawn ni ta a, Dr Zoa hi tunge a nih sawi nawn a ngai lo a, a hla thar hi a sa mawiin a sa hnehsawh lehpek hle. Palina aṭangin pahnihnaah a rawn invawrh a, pakhatna ni tur pawhin a dinhmun a ṭha sawt hle.

Sanga Renthlei 'Lal Isua duhawm ber' pawh pangana aṭangin pathumnaah a rawn invawrh ve bawk a ni.

C. Muani 'Arsi Engmawi' chu palina a ni a, One in Christ ft. Isaac Hnamte 'Fak hla mawi ri' chu pangana a ni bawk.

Crosscraft ft Fiona Pachuau 'Fak hla rimawi' chu parukna a ni a, Pensy, Lalbiaktluanga (Btea), Grace-i leh Esther KR Khiangte-te pawh Top 10 hian an lang ve bawk a ni.

1    Maruati & Rla     - A hnai reng Isua

2    Dr. Zova     - Ka puang zel dawn

3    Sanga Renthlei     - Lal Isua duhawm ber

4    C. Muani     - Arsi Engmawi

5    One in Christ ft. Isaac Hnamte     - Fak hla mawi ri

6    Crosscraft ft Fiona Pachuau     - Fak hla rimawi

7    Pensy     - Vengtu hmangaihna

8    Lalbiaktluanga (Btea)     - Fak tlak I ni

9    Grace Lalchhanhimi     - Ka chanchin

10    Esther LR Khiangte     - Isua ka thlang