Valentine's Day pualin thisen pek runpui

Association for Voluntary Blood Donation(AVBD) leh MSACS chuan kum danga an lo tih ṭhin angin, nimin February 14, 2025 khan 'Valentine's Day' pualin thisen pek runpui an buatsaih leh. Mi ṭhahnem takin a mamawhte tan a thlawnin thisen an pe.

Thisen pek runpui hi Dawrpui Multipurpose Hall ah neih a ni a, kumin thupui atan hian "Show Love, Give Blood" tih hman a ni. Kumin V-Day puala thisen pek hi Music Domain Mizoram leh LPS Youth Icon ten an ṭawiawm a ni.

Host Mafeli Hlondo kaihhruaina hnuaiha hun nuam tak hman a ni a, kalkhawmte hi 'Praise On 2024' pahnihna J.Lalruatsangi leh Icon star-te - Mawimawia, Samsona, J. Rosanga, Bm-a leh Peter-a ten zaiin an awi a ni.

Thisen pea kalte hi zaithiamte leh model kan neih ṭhat, Nunui Rualhleng leh lemchang thiam lar Sangsangi te bakah mi lar dangten lawmthu hrilh nan rose par sen mawi tak an lo hlan.

Valentine's Day puala thisen pek runpui neih ṭhin hi kum 2010 khan Zikpuii huaihawtin Aizawlah neih ṭan a ni a, hemi ṭum hian 'Blood for your Valentine' tih thupui hman a ni. A kum leh aṭangin AVBD leh MSACS huaihawtin neih chhunzawm a ni a, Aizawl bakah district khawpui hrang hrangah V-Day pualin AVBD leh Blood Bank thawk hoten Blood Donation Camp hi an huaihawt ṭhin bawk. V-Day puala thisen petute hi kumtin deuh thoin an pung chho a ni.

V-Day puala Blood Donation Camp huaihawt a hlawhtlin theih nan hian mimal, pawl leh department bakah private damdawi-in aṭanga ṭanpuina te an dawng ṭhina, hemi avang hian program nuam tak hman theih a nih phah ṭhin. Mi inpe leh thil phalte zarah blood donation camp hlawhtling tak neih theih ṭhin niin mamawhtu eng emaw zat tan thisen ṭhahnem tak pek a ni ṭhin.