John Legend-a'n US hnam hla thlak turin a ngen

US hnam hla, an national anthem 'Star spangled banner' hi tunhnaiah sawisel a tawk hle a, a racist tih a ni. John Legend pawhin a thlawp khawp mai a, thlak emaw siamṭha emaw turin politician-te a ngen.

He thu rawn irhchhuah zauna chu American footballer, Colin Kaepernick a ni. Kaepernick hian US national anthem sak laiin zahna lantir nan a ding lo ang tih a sawi a, he hla thu hi siam danglam emaw, siam ṭhat hret a nih chuan a ding tawh dawn lo tih a sawi. Chi inthliarna leh inawp behna a lang a ni a ti.

John Legend pawhin a thlawp hle a, Legend chuan he hla hian African-American te thah an nih chuan a chawimawi zawk a ni a ti. Kaepernick bawk hi sawi leh ta ila, kar hmasaa San Francisco 49ers ten pre-season game an khelh dawnin hnam hla sak laiin a ding duh lo. NFL media a hrilh danin, "Midumte awpbet a, tiduhdah ṭhinte hlaah ka ding ‚wm lo e mai," a ti.

American National Anthem

ρ "The Star-Spangled Banner" hla hi Francis Scott Key-a poem a ni a, a hnuah a thluk hi chu Britain-a zu hmun hla thlukin an sa. US-ah pawh zu hmun hlimhlawpna lamah an sa nasa ṭhin hle

ρ Phuah a nih chhan tak hi Battle of Fort McHenry aṭangin a ni. He indonaah hian British chuan Baltimore lawngchawlh hmun an bomb a, he indonaah hian American lam an chak. Fort McHenry-a US flag hlai tak mai, British-tena an lak thlak theih loh aṭanga phuah chhuah a ni

ρ Kum zabi 18-na chhoa official-a hnam hla ang renga an hman ber chu 'Hail, Columbia' a ni

ρ US-in hnam hla atana an hman chhan chu cartoon vang a ni. Kum 1929 khan Robert Ripley chuan 'Ripley's Believe It or Not' a tihchhuah, cartoon-a ziahah chuan US-in hnam hla an nei lo tih a tichhuak. Hei hi US mipuiten an ngaithiam lo hle a, a hnenah hian an lungawi loh thu an thlen nasa hle. Ripley hian an lungawi lohna chu ama hnena thlen lo tur leh, an politician-te hnena thlen zawk turin a ti a, chutiang chuan US mipuiten petition siamin sorkar an ngen a, kum 1931 khan US hian hnam hla an nei ve ta chauh a, "The Star-Spangled Banner" hi hnam hlaah an pawm ta a ni.

ρ Tunah hian an hnam hla hi an siam danglam nasa tawh hle. A phuahtu Francis Scott Key ngei pawh khan a hla phuah a ni tih a hre tawh lo ang an ti hial

ρ Sak a har hle a, a hla thu a har bawk si a, an sa sual nual tawh. Christina Aguilera chuan a sak laklawh laiin a hla thu a lo theihnghilh tawh a, Michael Bolton pawhin a hla thu a kutah a ziak a, a sa chhuak thei hram