Fashion Fiesta MTV VMA Red Carpet Fashion
Ni 25.08.2016 (Pathianni) a MTV VMA an neih zawh tak kha mite ngaihven leh hlut a hlawh hle a, a awards dawngtute ai mah chuan fashion lamin ngaihven a hlawh emaw tih tur a ni. Kum tina eng awards pawh, an sem dawna red Carpet-a milarte incheina hian mi ngaihven a hlawh zawk ta emaw tih turin a event a zawh meuh chuan tu milarin nge tu designer kawr nge a inbel tih velah chanchinthar lakhawmtute an buai nawk nawk hle. Thil thleng tawh mah nise ziah lan loh uiawm tak tak a awm avangin tlem azawng thai lang dawn ila.
Hemi zana awards paruk lai mai hum haw leh record thar siamtu ni bawk Beyonce chuan red carpet a rawn thlen tirh aṭang rengin mite mit a la nghal hle a, hemi bakah hian designer lar tak tak thawmhnaw pathum a inbel tel bawk. Red Carpet-a a thawmhnaw hak Ostrich hmul ang taka uai deuh siau siau, sava thla anga a dara tung chho hring dal da riai chu mite sawi hat a ni a, an hmuh tirh aṭang rengin tu siam nge tih zawhna chu mipui zingah a ri ring hle. A tlangpuiin Beyonce hian Givenchy-a designer Riccardo Tisci hi heng hun pawimawhah chuan a pan ber ṭhin a ni a, kumin VMA-ah erawh a tihdan phung thlakin designer hriat la hlawh lutuk lem loh, Francesco Scognamiglio thawmhnaw rawn inbelin a thawmhnaw siamtu pawh a lar phah viau a ni. Scognamiglio hi mi tam zawkin la hre vak lo mah ila a thawmhnaw hatute milar tak tak an ni fo mai a, chung zingah chuan Madonna leh Rihana te telin Beyonce Formation World tour-a a thawmhnaw hak pakhat pawh kha ama kutchhuak hi a ni nghe nghe. Design house changtlung leh lar tak Versace-a Donatelo hnuaiah thawkin kum 2000 khan amahin label a nei hrang a, 2016 anih meuh chuan designer satliah mai ni tawh lovin Couturer hlawhtling tak a ni ta a ni.
Beyonce timawi zual em emtu leh mit a lakna chhan pakhat a fanu Blue Ivy thawmhnaw dangdai leh man tam lutuk mai ha a, anu a rawn tawiawm chu a ni a, Ivy hian mini gown kan tih mai gold rawng leh net puk mang kheng, a hmalam chhing, naupang thawmhnaw designer lar chho mek Miachka Aoki thawmhnaw inbelin, pheikhawk Brand lar Zanotti pheikhawk rawng sang, crystal-a chei khah vek rawn inbelin a nu tluk zeta sawi hlawh leh mit la a ni. Beyonce tlereuh inbel hi USD maktaduai kaw man lai niin Lorraine Schwartz lunghlu man tam Emerald leh zungbun senno 12 carat leh zungbun dang 20 carat-a hlu te a inbel. A awards lakna pakhatah hian Elie Saab rangkachak rawng Jump suit leh bahfual inbelin awards a hum haw ṭeuh a ni.
Ani bakah hian Kim Kardashian West mini dress langtlang vek a hak te, Stella Maxwell-i'n Moschino Resort 2017 Crop Top leh kekawr tlang arh in-match tak mai a rawn inbel te, model lar chho mek, a hmelṭhat leh pian thiam em em ai maha a vun rawng danglam avanga mite hriat hlawh Winnie Harlow Gown taksa rawng leh, a dum in drape kual mawi tak te, Ashley Graham-i'n Naeem Khan thawmhnaw langtlang Sequins-a khat a rawn inbel te leh, sawi hmaih theih loh Nicki Minaj-i'n Bao Tranchi thawmhnaw pawl tak, taksa langtlang vek thei tura in-cut sawm te leh zaithiam, lâm thiam bawk chul thei lo, Britney Spears-i'n Julian Mc Donald thawmhnaw, smart tak si sexy tho si, a rawn inbelten mite mit a la hle a. Zaithiam, inchei thiam leh sawi hlawh tak Rihana erawh show a hawn dawn avangin red carpet-ah kan hmu lova, amaherawhchu, video Van Guard award a dawn dawna a hak Alexandre Vauthier kutchhuak ball gown puk hlei hluai, belt inbat nuaih, gold rawng eng lek lek erawh mite sawi a hlawh hle.
Nalh tak taka incheite an awm laiin nalh lo kan ti dawn nge, an ṭang ulh kan ti zawk dawn? Tih mai turin Cassie kekawr tlang arh tle vur nge a sam eng hlui chu mawi lo zawk tih pawh hriat hran theih lohin a incheina mite sawisel a hlawh hle. Teen mom changtu Farrah Abraham ve thung, hallowen costume a inbel emaw ni chu aw tih turin wonder women thawmhaw hak ang hain, boot chhah pui, silver colour a bun chu mite sawisel titamtu pakhat a ni. Inchei huai tak, thil inhmeh thei em em Rita Ora erawh tun ṭum chu a tisual deuh nge ni, a pheikhawk chhah, hmanlai tawh tak mai leh a kawr lang tlang ṭawp hneng hnuang tak chunga leather jacket sahmul inbel ṭup te chu VMA chhunga inchei thiam lo langsar zuala sawi an ni. Heng bakah hian sawi tura inchei thiam leh thiam lo chu an la tam a, amaherawhchu a langsar zual deuh kan rawn tarlang a ni e.
Tluangpuii Hmar
Instructress
Vakiria Institute of Fashion Technology