Ben Hur aia hlawhchham chiang film
Ben Hur film hlawchhamzia, a senso tam nen nen a, a sum lakluh a tlemzia kan tarlang tawh a, mahse kumin hian kha aia la che chhe lehzual a la awm cheu.
Ben Hur film aia la che chhe leh zawk chu The Sea of Trees a ni. He film hi actor lar Matthew McConaughey-a channa a ni. He film hi USD mtd 25 zet senga siam a ni a, mahse ni nga chhungin USD 2,730 chauh, box office aṭangin an la chhuak thei!
The Sea of Trees hi, Box Office Mojo tarlan dan chuan, US-ah cinema pakhatah chiah chhuah a ni a, chhuah a nih
ṭan aṭanga ni nga chhungin USD 2,730 che che a hmu tling thei a ni. August 26-a chhuah ṭan kha a ni a, McConaughey bakah Naomi Watts leh Ken Watanabe te an chang.
He film-ah hian McConaughey chu scientist angin a chang. A nupui a thih hnuah Japan-a hmun lar tak mai, mi tam takin tun thlenga an ṭih, Aokigahara Forest ( The Suicide Forest tia khawvelin a hriat lar mek) a tlawh a ni. He hmunah hian Takumi Nakamura (Watanabe) nen an inchhar a, chuta ṭang a nun danglam tak dan chanchin a ni.
A tira a siamtuten an beisei aiin mipuiin an lawm lo hle. Kum 2015 khan Cannes Festival-ah chhuah chhin a ni a, critics ten an sawisel nasa hle a, an chhuah laiin an 'boo' hial a, a ṭhen chuan an nuihsawh vel an ti!.