DJ-i ṭhian a la rinawm ber

Hontrade International Ṭhazual Lengzemah DJ Lalvenhimi hla 'Ṭhian rinawm' chu a la rinawm reng a, pakhatna a luah leh.

DJ-i hian 'Ṭhian rinawm' hla hmangin Hontrade International Ṭhazual Lengzemah a vawi thum nan pakhatna a luah a, kumina lengzem chhunga hla hit ber dawttu a ni. Kumin chhunga lengzema hit ber rih chu Lawmi Khiangte hla 'Kan hlim lai' kha a ni a, a zawnin Ṭhazual chart-ah pakhatna ṭum li a ni thei.

'Ṭhian rinawm' hi eng chen nge pakhatnaah a awm theih ang tih sawi thei loin, DJ-i hian hla hit dang a rawn vawrh chhuak leh thuai dawn nge dawn lo tih sawi thei lo mah ila DJ-i hian kumin hian eng emaw tak chu min min hlui leh a rinawm. Tuna a hla hit mek a tihchhuah hlim khan DJ-i hian kuminah album tihchhuah a tum thu a lo sawi ri tawh a, eng chen chiah nge a peih tawh tih erawh a sawi theih loh.

Zinna tur programme a nei deuh reng a, a zin chhuak deuh reng a, hetiang karah hi chuan album buatsaih emaw, album siam emaw pawh a harsa viau. Amah DJ-i ngei pawhin hmalak tumna tam tak a nei tih a sawi a, mahse zin chhuah a ngaih reng avangin hma a lak tak tak theih loh tih a sawi. Kumin hian music video dang min chhawpchhuahsak loh pawhin album chu kan hmu turah ngai phawt ang.

Josephine Lalawmpuii'n hma a sawn thei mai ang em aw kan tih laiin Thangromawia a rawn lang tlat a, Josephine-i pathumnaah a tla thla a, Thangromawia pahnihnaah a rawn chho. Thangromawia pakhatna pawh lo hauh tawh, tunlai lengzem mipaa kan neih ṭhat pawl a nih avangin a beiseiawm khawp mai Pangana aṭangin Rachel Lalnunkimi chu palinaah a kai a, parukna aṭangin F. Zomuanpuia chu panganaah a rawn chho thung.

Top 10-ah Sangkimi Khiangte hla thar 'Lunglam ka vai' a rawn lang a, 10-naah bul a ṭan. Lang thara thleng sang zawk chu C. Sanga a ni a, 'Ka ram tan i thawk ang u' tih hla chu pariatnaah a rawn lanpui nghal thei a, Daduhi nena an sak, 'A zual zel si' chu Top 10 aṭangin a liam ta thung.