Mother Teresa tan Rita Ora a zai

Pathianni zan khan Vatican-a Papal Basilica-ah Mother Teresa mi thianghlima puan lawmna concert buatsaih a ni a, hetah hian Rita Ora a zai.

He concert-ah hian Rita Ora hian 'What Child is This' tih hla a sa a, Roman Catholic puithiam tam tak leh Pope Francis te chu he concert-a kal langsarte an ni.

Mi tam tak Rita Ora zai tura an sawm daih hi mak an ti hle a, amah zaithiam lar tam tak an awm laia amah a zai hi zawhna pawh an zawt a ni. Mother Teresa hi Skopje khuaa piang a ni a, a pian hunlai hi Ottoman lalram chhunga awm a ni a, hetihlai hian Skopje pawh hi Kosovo bial chhunga awm a ni ṭhin, tunah chuan Macedonia ramah a awm tawh thung. Rita Ora hi Kosovo khawpui, Pristina-a piang a ni a, a hnua UK-a raltlan ta an ni.