Bollywood leh car

Bollywood-ah hian sum a tam a, film star reng reng an hlawhtling viau zel. An hlawhtlingin sum an ngah tih a hriatna chu an car khalh ṭhin aṭangin a hriat.

Piyanka Chopra hi a lar a, motor pawh a nei changkang hle. Car nen a leng chhuak tam vak lo a, zan reia eng emaw tih tur a neih chauhin Chopra hian car a lek chhuak tlangpui. Chung a chhuahna atana a hman ber chu cheng vaibelchhe hnih man Rolls Royce ngat a ni. Porsche Cayenne leh Mercedes S Class te pawh a ch‚ng chuan a khalh chhuak ve bawk.

Ranbir Kapoor hian Audi car hi a ngaina ber a nih hmel a, a kawl reng mai. Tuna a hman tlanglawn ber chu Audi R8 a ni. India-ah he car hi cheng vaibelchhe 1.46 vel a ni. Shah Rukh Khan, khawvel actor hlawhtling leh sum lalut hnem ber zinga mi hian cheng vaibelchhe 12 man, Bugatti Veyron ngat lo chu a ti deuh tlat. Khan hian driver pakhat chauh a nei a, a car enkawl engkimah a driver kutah hian a innghat deuh tawp a ni ber. Shah Rukh hian a car dahkhawmnaah Audi Q6, Bentley Continental GT, BMW 7 Series leh 6 Series, BMW Convertible, Mitsubishi Pajero SUV leh Rolls-Royce Phantom te pawh a ṭul chang apianga khalh tur a nei tho.

Amitabh Bachchan leh Sanjay Dutt inanna chu Rolls Royce car an ngaina ve ve hi a ni. Sanjay Dutt hian tunlaia a khalh ṭhin chu vut buak rawng a ni. Amitabh pawh hian Rolls Royce tho a nei a, Rolls Royce Phantom kher a khalh a, cheng vaibelchhe 5 man vel chu a ni awm e. Big B hian hei chauh hi a nei lo a, a garage-ah Bentley Continental GT, Range Rover, Lexus LX470, Mercedes SL500, Porsche Cayman S, Mercedes E 240, BMW X5, BMW 7 Series leh Mercedes S320 te pawh a hung tho a nia.