Krismas Ṭhazual Khawi Khuaah nge Krismas i hman dawn le?

Zonet Ṭhazual lam chuan Krismas pual bikin Krismas Ṭhazual chart an rawn buatsaih a, chart top 10-a rawn inlan ho pawh an ṭha hlawm khawp mai. Kuminah Krismas hla thar dangdai tak tak, fakna hla bakah lengzem leh lenglawng lam thlengin Krismas hla thar ṭha tak tak chhuak thar a awm a, chung zingah Rebecca Lallawmsangi hla hit tak mai 'Kan khua' chu pakhatna a ni. 

Mizo hla music video zinga YouTube-a million view kai hmasa ber Rebeccal Lallawm­sangin hla thar 'Kan khua' chu Krismas Ṭhazual No.1 a ni. A phu hle.

"Kan Khua hi kar khat lek chhungin 1 Million entu an tling pha a, a hre zawkte'n an chhut dan chuan Mizo hlaa Million hit rang ber a ni hial awm e, ka lawm e ka lawm takzet e. Ka Production Team-te an fakawm takzet a Music Producer leh Hla phuahtu ni bawk Peka Fanai te, Record Producer fel em em, rim tak leh hah taka Audio min khawih saktu Ruata (The Pee Bee Records) leh Videographer bawn tak leh inpe zo Daama Chongthu te chungah thinlung takin lawmthu ka sawi," tiin Rebecca-i chuan a hla thar chungchanga a lawmzia hi a sawi a, ngaithlatu leh Meme leh kawng hrang hrang hmanga a video lo tilartute zawng zawng hnenah lawmthu a sawi bawk.

Rebecca-i hian kuminah music video pahnih a tichhuak a, 'Kan khua' bakah hian 'Dam dam' a tichhuak bawk a, chu pawh chuan thlirtu maktaduai chuang a nei leh der tawh. Rebecca-i tan hian kumin hi kum ṭha a ni ngei ang. 'Kan khua' hian nimin thleng khan YouTube-ah thlirtu maktaduai 1.8 chuang a nei tawh a, 2 million hit rang ber a ni leh thei angem tih chu hriat a chakawm hle.

Rpa ft Hlimhlimi 'Lalber Thar (Ngai Ru Ngai Ru)' chu pahnihna a ni a, Krismas fakna hlaah chuan pakhatna a ni thung. Tunlai zaithiam huhang ngah ber zinga mi pahnih thawkdun hian November thla tawp khan an hla thar hi an tichhuak a, mi nuai 1.6 chuangin YouTube-ah thlir tawhin kumina Krismas hla ngaihthlak hlawh ber pawl a ni tih a chiang.

Pathumna leh palina pawh fakna hla bawk a ni a, R. Lalruatfeli hla thar 'I chungnung ber e' chu pathumna niin Bethsy Lalrinsangi 'Krismas, Isua tan' chu palina a ni thung. Tunlaia lengzem artist hmeichhe zinga huhang ngah ber pawl Jaui hla 'Thlasik daifim' chu pangana a ni thung. Top 10-ah hian Sangpuii Hlawndo & David Zawma, Mercy Remsangmuani, Mawitea Chawngthu, PCa & Maruata leh Essy-te pawh an lang a ni.

1     Rebecca Lallawmsangi     - Kan khua

2     RPa & Hlimhlimi     - Lalber thar

3     R. Lalruatfeli (Mapuii)     - I chungnung ber e

4     Bethsy Lalrinsangi     - Krismas, Isua tan

5     Jaui     - Thlasik daifim

6     Sangpuii Hlawndo & David Zawma     - Krismas chibai buk nan

7     Mercy Remsangmuani     - Nau piang tan

8     Mawitea Chawngthu     - Amia'n riang maw

9    PCa & Maruata     - Thlasik rim

10     Essy     - Krismas nangnen