Hip Hop star zingah P.Diddy a hausa ber

Music ngawr ngawr aṭanga an sum lakluh chhut ni ta se, P. Diddy hi sum lalut hnem ber chu a ni hauh lo ang, amaherawhchu sum lakluhna chi hrang hrang a ngah hle a, hengte avang hian Hip-hop star zinga sum lalut hnem ber a la ni thei.

Forbes chanchinbuin hip-hop star zinga sum lalut hnem ber a tarlanah P. Diddy chu tuma tluk loh a ni a, thla 12 liam ta chhung khan USD mtd 62 a thawk chhuak. Ani hi nikum pawh khan pakhatna a ni a, nikum kha chuan USD mtd 60 a thawk chhuak. Dr. Dre-a'n a Beatz a hralh hnu lawk khan pakhatna a rawn ni ve zawk a, he mi hma leh hnuah P. Diddy tluka sum lalut hnem hi an awm thei lo a ni ber mai.

P. Diddy hian music ngawr ngawr aṭang chuan sum a lalut hnem tawh vak lo a, mahse Ciroc Vodka nena deal an neih aṭang te, company hrang hrang nena an thawhdunna aṭangtein sum hi a lalut hnem.

Jay Z hi pahnihna a ni a, kumin chhungin USD mtd 53.5 lai a lalut. Thla 12 liam ta chhung khan show leh concert chu a nei tam lo khawp mai a, mahse Roc Nation entertainment company aṭang hian sum a lalut hnem hle a, hei bakah hian Armand de Brignac champagne nen te, D'Usse cognac te nen an thawkho a, heng aṭang hian sum a lalut hnem hle bawk. Dr. Dre chu pathumnaah a la lang thei a, sum a lakluhna hi sumdawnna kawng hrang hrang leh a music aṭangtein a ni.

Top 10-a lang pha lo zingah, Kanye West chu 11-naah a lang a, kum khat chhungin USD mtd 17.5 a thawk chhuak a, Lil Wayne chu 14-na niin, USD mtd 14 a lalut. Macklemore & Ryan Lewis pawhin USD mtd 14 tho an thawk chhuak a, Snoop Dogg chu 17-na a ni a, USD mtd 12.5 lalutin, Eminem chuan USD mtd 11 lalutin 19-naah a lang.

P. Diddy - $mtd 62

Jay-Z - $mtd 53.5

Dr. Dre - $mtd 41

Drake - $mtd 38.5

Wiz Khalifa - $mtd 24

Nicki Minaj - $mtd 20.5

Pitbull - $mtd 20

Pharrell Williams - $mtd 19.5

Kendrick Lamar - $mtd 18.5

Birdman - $mtd 18