2025 BAFTA Film Awards: 'Conclave' leh 'The Brutalist' che ṭha

British Academy of Film and Television Arts (BAFTA) Film Awards, Pathiannia semah Pope drama 'Conclave' leh immigration epic 'The Brutalist' te an che ṭha hle.

German director Edward Berger-a siam 'Conclave' hian award pali a dawng a, chung zingah chuan best film leh best British film an tel. 'Conclave' hi 2019-a war drama, '1917' hnua a ruala heng award pahnih la leh thei hmasa ber a ni. US film siamtu Brady Corbet-a siam, 'The Brutalist' pawhin award pali a dawng a, Corbet hian best director lain, a changtu Adrien Brody chuan best actor a dawng bawk. He film-ah hian Brody hi Hungarian architect leh Holocaust damchhuak, László Tóth lemah a chang a ni. Mikey Madison chuan 'Anora' film aṭangin best actress a dawng a, Kieran Culkin chuan 'A Real Pain' film aṭangin best supporting actor leh Zoe Saldaña-in'Emilia Pérez' aṭangin best supporting actress a dawng bawk.

2025 BAFTA Film Awards hi London-a The Royal Festival Hall-ah neih a ni a, David Tennant-a'n a host a ni. Hemi zan hian Warwick Davis chu film, games leh television lama a thawh hlawk vangin chawimawina ngaihhlut, BAFTA Fellowship hlan a ni.