Khawvel University tha thlanah India-a zirnate dinhmun a hniam

Khawvela university ṭha thlan chhuah tharah India rama zirna sangte an lanna a hnung hle a, US, UK leh Singapore-a zirna hmunte khawvela zirna hmun ṭha ber berte an ni thung.

Quacquarelli Symonds World University Rankings 2016/17 tar chhuahah US-a mi, Massachusetts Institute of Technology chu university ṭha bera thlan a ni a, pahnihna pawh US-a mi tho, Stanford University a ni. Harvard University, US chu pathumna a ni a, UK-a zirna hlun, University of Cambridge chu palinaah langin, California Institute of Technology (Caltech) chu pangana a ni.

India rama zirna hmun kan neih
ṭhatte erawh an dinhmun a ṭha tawk lo. Nikuma university ṭha 700-a lang pha India rama zirna hmun 10 zinga pakua chuan nikum an pha lo vek a, IIT Madras erawh nikum aiin a che ṭha zawk. IIT Madras hi nikum kha chuan 254-na a ni a, kuminah 249-naah hma a sawn chho a, amaherawhchu India rama zirna hmun lang zinga dinhmun sang ber erawh a ni lo.

Indian Institute of Science Bangalore chu India ram university zinga thleng sang ber a ni a, 152-naah a lang a, nikum nena khaikhin chuan a tlahniam. Nikum khan IIS Bangalore hi 147-naah a lang pha a ni. IIT Delhi chu kuminah 185-naah a lang a, nikum kha chuan 179-na a ni. IIT Bombay chu India-a pathumna a ni a, nikuma 202-na kha kuminah chuan 219 a ni tawh thung. University 700 china lang dangte chu IIT Kanpur, IIT Kharagpur, IIT Roorkee, IIT Guwahati, University of Delhi, University of Calcutta, Banaras Hindu University, Panjab University, University of Mumbai leh University of Pune te an ni.

Khawvel huapa zirna hmun ṭha tarlan a, a ṭha zual 10 zingah hian US-in panga a thawh a, UK-in pali leh Switzerland-in pakhat a thawh. Asia aṭanga lang zingah National University of Singapore chu a
ṭha ber a, 12-naah a lang a, 13-na pawh hi Singapore-a mi, Nanyang Technological University a ni. Asia aṭanga lang, thleng sang chin zingah Tsinghua University, China chu 24-na a ni a, University of Hong Kong chu 27-na, University of Tokyo chu 34-na, 35-naah Seoul National University, The Hong Kong University of Science and Technology chu 36-na, Kyoto University, Japan chu 37-na te an ni.