Fashion Fiesta

Khawvel changkang chho zelah incheina te, nunphung te leh hnam ziarang te chawi lar leh chawi san a ni chho zel a. Ram a changkang a, technology-ah nasa taka kan ṭhang chung hian mihringte nunphunga hlui thei lo leh ni tina kan nun nena inkawp tlat lehkha chhiar hlutna a bo thei lo. Computer hmaah ṭhuin Google-ah kan duh duh hmeh chhuah theih leh chhiar theihin awm mah se lehkhabu ziak ngeia kan chhiar hi chu a dan a la dang tlat. Kum upa lam deuh leh mi tam zawk hi chuan zing thawh veleh Computer hmaa ṭhut ai chuan chanchinbu kan thlek hmasa fo. Chutiangin nalhna thurukte, hmelṭhatna te, a hnawih lam chi eng ilo te leh incheinaa thar ber ber leh tunlai ber ber hi internet-ah leh TV ah nitinin hmuh theihin awm mah se, chanchinbu leh Magazine-a inziakte chu kan ngainat leh thlek ber ala ni ta fan a ni. Hemi lam hawi zawnga inelna pawh Company lian hrang hrang inkarah a nasa chho hle a, inelna thianghlim siamin hmai/hmel taksa leh nunphung enkawl dan leh tunlaina kawngah nasa takin min pui chho ta a ni. Chung lehkhabu Magazine kan tih maiho hi ṭhalaite zingah a tla nain (a bikin fashion design zirlaite tan) update-na ṭha tak atan kan hmang chho mek a, chung Magazine zinga khawvel mite hlut hlawh zual deuh deuhte han tarlang dawn ila. Nang pawhin i hlawkpui hle turah ngai ang.

1. Look Magazine : He magazine-in a tarlan deuh ber chu milarte chanchin leh high fashion kan tih te leh tunlai incheina lar ber berte niin European Fashion Magazine zinga chungnung pawl tak a ni a, inchei dan tur idea ṭha tak tak chhiartute hnenah an pe ṭhin a ni.

2. Cosmopolitan Magazine : Khawvel pum huap hmeichhe fashion magazine niin 1886 khan a hmasa ber chu print a ni a, a tirah chuan chhungkaw lam hawi niin 60ís chho aṭang chuan hmeichhe magazine a leh a lo ni ta a ni. Hmeichhe harsatna te, nupa nun leh inngaihzawnna chungchang te, hriselna te, hna lam chungchang te leh fashion lam te min chhawpchhuahsak ṭhin. Khawvelah ṭawng hrang 35 dawn laia lehlin niin khawvel ram 110 chuangah he magazine hi chhuah a ni bawk.

3. People Style Watch Magazine : Kar tin chhuak magazine niin mi larte bakah mihring nunphung tihlan ṭhin a ni a, khawvel magazine-a chhiartu ngah ber pawl a ni. Advertisement lamah hian an sang lawr lak a, 2005 phei chuan Magazine of the Year a thlan a ni nghe nghe. Magazine dangte aia a danglamna pakhat chu milarte leh mi pangngai nunphung an tihlan dan a inzat chiah chiahna hi a ni awm e.

4. Harpers Bazaar Magazine : 1867-ah chhuah
ṭan niin a tir chuan kar tin chhuak tura duan a ni a, khawvel designer lar leh thlalatute, kut themthiam≠te leh ziak mite chanchin mai piah lamah chung mite thuziak, mi chawk phur thei tak takte chhuah ṭhin a ni. Tlema kei ka ni inti deuh tena fashion lama an r‚wn ber pawl ni chhoin 1901 aṭang chuan changtlung zawka siam niin a thlabi angin an chhuah ta a ni.

5. Marie Claire Magazine : France ramah 1937 khan chhuah ṭan niin hriselna lamtluang, hmel, hmai enkawl dan leh fashion lamte an tihlan ber niin khawvel hmun hrang hrangah magazine lar ber pawl a ni chho ta a, 2006-ah khan website anmahni pual hian siam tharin nitinin show, thlalak leh fa≠shion kaihhnawih chanchin te, horoscope thlengin mipuite hmuh theihin min chhawpchhuahsak ṭhin a ni.

6. Instyle Magazine : US lam chhuak magazine niin advertisement an khawih nasa hle a, intihlar duh tana magazine ṭha tak pakhat a ni reng a ni. Fashion mai bakah in leh a vel chei dan te, mi thilphalte inpekna te leh milarte chanchin ziahlan ṭhin niin magazine dangte aia a danglamna pakhat leh chu a cover a model pian nalh ringawt lo, zaithiam leh lemchang mite rawn hmang hmasa pawl niin, vawiina an intihhmuh chhoh tak hle hi a ni.

7. Grazia Magazine : Khawvel pum huap magazine lar tak niin mimal tak pawha ka magazine ngainat ber pawl a ni a, March 2004 khan Bulgaria-ah international edition bik hi bul rawn ṭanin a kum lehah British lam ve thung siamchhuah leh niin chutah Greek, chumi hnuah UAE, Croatia leh Russia leh Dutch edition bikte 2007-ah siam chhoh zel a ni. Asia-ah ve thung chuan 2008-ah bul rawn ṭanin India ram chhunga fashion magazine kan hmuh zingah chuan a rawn tlak ber pawl a ni awm e. Incheina lam ngaina bik tan phei chuan idea ṭha tak tak thla tina min pe ṭhintu a ni.

8. Vogue Magazine : The World Most Powerful Fahion Magazine tih hiala New York Times-in a sawi Vogue Magazine hi a hming leh fashion lam hrim hrim hi chu a inkaihhnawih nghet hle a, May 2003 khan intiamkamna felfai tak ziakin khawvel hmun hrang hranga ṭawng hrang hranga an magazine chhuahtute chuan chhiartute rilru sukthlek an tidanglam thei tih hriain model cher tak takte hmang lova tlema ria chum lam te hmang turin agreement an sign nghe nghe a ni.

9. Glamour Magazine : US ah 1939-ah hmeichhe magazine tura duan niin a tirah chuan Glamour of Hollywood tih deuh kher a ni ṭhin. Ram 15 aia tam mahah he magazine hi tihchhuah niin kum tinin Glamour Girl of the Year Awards, hmeichhe huaisen, sulsutu leh mite nun khawih danglam tute hnenah hlan ṭhin a ni.

10.Elle Magazine : Khawvel pum huap magazine a nihna angin an Headquarters ber chu Paris-ah a awm a, khawpui lar - London, Tokyo, Delhi, Warsaw, Jakarta, Madrid, Milan leh khawvel khawpui langsar tak takah te inzarpharhin fashion, hriselna huang, intihhlimna, incheina lam hawi zawng te chhuah ṭhin a ni a, khawvel magazine lar berte zinga mi a ni mek

Tluangpuii Hmar

Vakiria Institute of Fashion Technology