Karnataka-ah nawrh huaihawt chhunzawm

Supreme Court thupek anga Karnataka sorkarin Tamil Nadu state hnena Cauvery lui tui a pek vangin Karnataka-ah lungawi lohna lantir chhunzawm zel a ni.

Bengaluru khawpuiah chuan nimin khan school leh college-te khar an ni a, IT office liante pawh khar vek an ni bawk. Bengaluru khawpuia cheng, mi maktaduai 10-te tana tui thianghlim lakna pui ber chu Cauvery lui hi a ni. Cauvery dam pali zinga pakhat, KRS Dam-a nawrh huaihawta pungkhawmte chu police-ten tiang nen an hnawtdarh. Nawrh huaihawt hi Bengaluru khawpui bakah Mandya, Mysuru, Ballari, Koppala, Chikkaballapura, Dharwad leh Kolar-ahte an nei.

Tamil Nadu leh Karna≠taka inkar kawngpui chu khar an ni a, Bengaluru leh Mysuru inkalpawhna dan a ni bawk. Bengaluru Metro pawh khar a ni a, khawpui chhunga motor tlanchhuak hmuh tur a tlem hle. Mipuite chu Tamil Nadu registration number motor nena Karnataka state chhung lut lo tura ngen an ni.

Karnataka CM Siddara≠maiah chuan Prime Minister Narendra Modi-a lehkha thawnin, Tamil Nadu Chief Minister J Jayalalithaa-i nena meeting an neihna tur ruahman sak turin a ngen. State chhung hmun hrang hranga nawrh huaihawt avang chuan an state economy pawhin a tuar phah hle tih a sawi.

CM Siddaramaiah chuan mipuite chu buaina chawk chhuak zawnga che lo tur leh, bandh huaihawt chhung pawhin vantlang leh sorkar hmun pawimawhte khawih lo turin a ngen. Dan leh thupek kengkawh turin state chhung hmun hrang hrangah venhimna khauh zawka kalpui a ni a, Kerala leh Andhra Pradesh aṭangin security force company hnih leh Maharashtra aṭangn company khat bakah, central force company 10 dah luh belh an ni.